දෙහිවල ජාතික කම්කරු කොංග්‍රසයට අයත් ගොඩනැගිල්ලක් ව්‍යාජ ඔප්පුවක් භාවිත කරමින් වංචනික ලෙස බදුදීමේ චෝදනාව සම්බන්ධයෙන් අමාත්‍ය වසන්ත සමරසිංහ සහ තවත් දෙදෙනෙකු සැකකරුවන් ලෙස නම් කරන්නේද යන්න පිළිබඳ නීතිපතිවරයාගෙන් තවමත් උපදෙස් ලැබී නොමැති බව කොළඹ වංචා කාර්යාංශය ගල්කිස්ස මහේස්ත්‍රාත් අධිකරණයට දන්වා තිබේ.

පසුගිය සතියේ නඩුව කැඳවූ අවස්ථාවේදී ගල්කිස්ස මහේස්ත්‍රාත් පසන් අමරසේනට කොළඹ වංචා කාර්යාංශය මේ බව දැනුම් දුන් අතර නීතිපතිවරයාගේ උපදෙස් ලැබුණු වහාම පරීක්ෂණ ආරම්භ කරන බව ද දන්වන ලදී.

කිරුළපනේ දයාජි අමරසිංහ විසින් කරන ලද පැමිණිල්ලකට අනුව මීට අදාළ පරීක්ෂණ ආරම්භ කර තිබිණි.

ගොඩනැගිල්ල බදු දීමෙන් රුපියල් මිලියන 3.6ක වංචාවක් සිදුකිරීම සම්බන්ධයෙන් අමාත්‍ය වසන්ත සමරසිංහ, නියෝජ්‍ය අමාත්‍ය මහින්ද සමරසිංහ සහ කඩුවෙල නගරාධිපති රන්ජන් ජයලාල් යන අය සැකකරුවන් ලෙස නම්කරන ලෙස අගතියට පත් පාර්ශවයේ නීතිඥයෝ ඉල්ලා සිටියහ.

සමරසිංහ ඔප්පුවේ බදුකරු ලෙස අත්සන් කළ බවට චෝදනා ලැබ සිටින අතර අනෙක් දෙදෙනා කුලී නිවැසියන් ලෙස අත්සන් කර සිටිති.

මහේස්ත්‍රාත් අමරසේන පොලිසියට නියෝග කළේ නීතිපතිවරයාගෙන් උපදෙස් ලබාගෙන ජුනි 12 වැනිදා ඊළඟ නඩු දිනයේදී මේ පිළිබඳ අධිකරණයට දැනුම් දෙන ලෙසයි.