February 19, 2026
වැඩිවන දේශපාලන පීඩනය සහ පාලන ගැටළු සමබන්ධ කරුණු දක්වමින් සඳමාලි චන්ද්රසේකර ලංකා සීනි සමාගමේ සභාපති ධුරයෙන් වහාම ක්රියාත්මක වන පරිදි ඉල්ලා අස්වී තිබේ.
කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති වෙත යොමු කරන ලද ලිපියක චන්ද්රසේකර පවසා ඇත්තේ, යහපාලනය සහ ආයතනික අඛණ්ඩතාවට අනුකූලව තම රාජකාරි ඉටු කිරීමට නොහැකි වීම නිසා තමන් ඉල්ලා අස්වන බවයි.
පාඩු ලබන රාජ්ය ව්යවසායයක් වන ලංකා සීනි සමාගම, රාජ්ය ව්යවසාය දෙපාර්තමේන්තුව විසින් පනවන ලද දැඩි නියාමන සහ මූල්ය පාලනයන් යටතේ ක්රියාත්මක වන බව ඇය සඳහන් කළාය.
වගවීම සහතික කිරීම සඳහා එවැනි රාමු අවශ්ය බව පිළිගන්නා අතරම, ආයතනයට ක්රියාත්මක විය හැකි ආකාරය සහ බාහිර ඉල්ලීම්වලට ප්රතිචාර දැක්විය හැකි ආකාරය සම්බන්ධයෙන් සීමාවන් පනවා ඇති බව ඇය පැවසුවාය.
ඇයගේ ධුර කාලය තුළ, අදාළ චක්රලේඛ, රෙගුලාසි සහ ස්ථාපිත නීතිමය ක්රියාපටිපාටි උල්ලංඝනය කිරීමට අවශ්ය වන ඉල්ලීම් සහ අපේක්ෂාවන් සමාගමට දැනුම්දුන් අවස්ථා කිහිපයක් ඇති බව ඇය පැවසුවාය.
“එවැනි තත්ත්වයන් යටතේ, අධ්යක්ෂ මණ්ඩලය, ප්රධාන විධායක නිලධාරියා සහ මම අපගේ ව්යවස්ථාපිත සහ භාරකාර බැඳීම්වලට දැඩි ලෙස බැඳී සිටිනවා, අමනිසා එවැනි ඉල්ලීම්වලට අනුකූල වීමට නොහැකි වුණා,” ඇය පැවසුවාය.
මෙම ස්ථාවරය ඇතැම් ප්රාදේශීය දේශපාලනඥයන් සමඟ ගැටුම් වැඩි කිරීමට හේතු වූ බව චන්ද්රසේකර පැවසුවාය.
සමාගම ක්රියාත්මක වන නීතිමය සහ නියාමන සීමාවන් පැහැදිලි කිරීමට නැවත නැවතත් උත්සාහ කළද, එම පැහැදිලි කිරීම් ඔවුන් පිළි නොගත් බව ඇය පැවසුවාය.
නීතිය, රෙගුලාසි සහ රජයේ චක්රලේඛවලට අනුකූල නොවන ලෙස ක්රියා කිරීමට ප්රාදේශීය දේශපාලනඥයන්ගෙන් ලැබුණු සහ අඛණ්ඩව එල්ල වන පීඩනය හේතුවෙන් ඇයගේ රාජකාරි ඉටුකිරීම වඩ වඩාත් දුෂ්කර වී ඇති බව ඇය තවදුරටත් පැවසුවාය.
“මෙම තත්ත්වයන් යටතේ, ආයතනයේ යහපත සඳහා සහ මගේ වෘත්තීය ආචාර ධර්මවලට අනුකූලව මගේ රාජකාරි ඉටු කිරීමට මට නොහැකි වී තිබෙනවා. එමනිසා මෙම තනතුරෙන් ඉවත් වීම සුදුසු සහ අවශ්ය බව මම විශ්වාස කරනවා,” ඇය පැවසුවාය.
මෙම භූමිකාවේ සේවය කිරීමට ලැබුණු අවස්ථාව සඳහා චන්ද්රසේකර කෘතඥතාව පළ කළාය.
