ශ්‍රී ලංකා නීතිඥ සංගමයේ සාමාජිකයන් හෙට (16) දිවයින පුරා අධිකරණවල කිසිදු නඩුවක් වෙනුවෙන් පෙනීනොසිටීමට තීරණය කර ඇත.

නීතිඥවරයකු සහ ඔහුගේ බිරිඳ වෙඩිතබා ඝාතනය කිරීම සම්බන්ධයෙන් අද පැවති විශේෂ මහාසභා රැස්වීමකදී මෙම තීරණය ගෙන ඇත.

එම සංගමයේ සාමාජිකයින් ප්‍රහාරය පිළිබඳව සවිස්තරාත්මක සාකච්ඡා පැවැත්වූ බවත්, සහයෝගීතාවය සහ විරෝධතාව පෙන්වීමක් ලෙස හෙට අධිකරණ කටයුතුවලින් වැළකී සිටීමට එකඟ වූ බවත් ශ්‍රී ලංකා නීතිඥ සංගමයේ සභාපති නීතිඥ රජීව් අමරසූරිය සඳහන් කළේය.

මෙම තීරණය තමන්ගේම කෙනෙකුට එල්ල වූ ප්‍රහාරයකට ප්‍රතිචාර වශයෙන් නීති ප්‍රජාවේ සාමූහික ස්ථාවරය පිළිබිඹු කරන බව ඔහු පැවසීය.

අකුරේගොඩ දී නීතිඥවරයකු සහ ඔහුගේ බිරිඳ ඝාතනය කිරීම සම්බන්ධයෙන් ඉදිරි පියවර සාකච්ඡා කිරීම සඳහා නීතිඥ සංගමයේ සාමාජිකයෝ අද (15) කොළඹට රැස්වූහ.

රැස්වීම අලුත්කඩේ නීතිඥ සංගම් මූලස්ථානයේදී පැවැත්විණි.

වසර 14 කට පසු නීතිඥ සංගමයේ සියලුම සාමාජිකයන් කොළඹදී සාමූහික රැස්වීමක් සඳහා රැස්වූ පළමු අවස්ථාව මෙයයි.

අද පැවති රැස්වීමට නීතිඥයින් 3,500 ක් පමණ සහභාගී වූ අතර, තවත් පිරිසක් Zoom හරහා සහභාගී වූහ.