විදේශ කටයුතු, විදේශ රැකියා සහ සංචාරක අමාත්‍ය විජිත හේරත්ගේ ලිපි ශීර්ෂය වංචනික ලෙස භාවිත කරමින් විදේශ රැකියා ජාවාරමක නිරත වූ බවට චෝදනා එල්ල වී ඇති එක්සත් ජාතික පක්ෂය නියෝජනය කරන යටිනුවර ප්‍රාදේශීය සභාවේ හිටපු මන්ත්‍රීවරයකු ශ්‍රී ලංකා විදේශ රැකියා කාර්යාංශයේ විශේෂ විමර්ශන ඒකකයේ නිලධාරීන් විසින් අත්අඩංගුවට ගෙන තිබේ.

අත්අඩංගුවට ගැනීමේදී, සැකකරු සතුව තිබී ව්‍යාජ ලිපි ශීර්ෂ කිහිපයක්, විදේශ ගමන් බලපත්‍රවල ඡායා පිටපත් සහ විදේශ රැකියා අයදුම්පත් ගණනාවක් සොයා ගත් බව අමාත්‍යාංශය නිවේදනයක් නිකුත් කරමින් කියා සිටියේය.

කැනඩාවේ රැකියා අවස්ථා ලබාදෙන බව පවසා සැකකරු පුද්ගලයන් 11 දෙනෙකුගෙන් මුදල් වංචා කර ඇති බවත්, එම පුද්ගලයන්ගෙන් රුපියල් මිලියන 3කට වඩා ලබාගෙන ඇති බවත් විමර්ශනවලින් හෙළි වී තිබේ.

සැකකරු නීති විරෝධී බඳවා ගැනීමේ කටයුතු සඳහා අමාත්‍ය විජිත හේරත්ගේ ලිපි ශීර්ෂය භාවිත කරන බවට ශ්‍රී ලංකා විදේශ සේවා නියුක්ති කාර්යාංශයට ලැබුණු පැමිණිලි දෙකකට අනුව ජනවාරි 26 වැනිදා මෙම අත්අඩංගුවට ගැනීම සිදු කළ බව අමාත්‍යාංශය පැවසීය.

රාජගිරිය ඔබේසේකරපුර ප්‍රදේශයේ ලැගුම්හලක රහසිගතව මෙම ජාවාරම මෙහෙයවමින් සිටියදී ඔහු අත්අඩංගුවට ගත් බව ශ්‍රී ලංකා විදේශ සේවා නියුක්ති කාර්යාංශය පවසයි.

මහනුවර පිළිමතලාව ප්‍රදේශයේ පදිංචි සැකකරු යටිනුවර ප්‍රාදේශීය සභාවේ හිටපු මන්ත්‍රීවරයෙකි.

එපමණක් නොව, ඔහු මධ්‍යම පළාත් සභාවේ හිටපු විපක්ෂ නායකවරයාගේ කාර්ය මණ්ඩලයේ ද සේවය කර ඇති අතර එක්සත් ජාතික පක්ෂයේ කැපී පෙනෙන ක්‍රියාකාරිකයකු ලෙස ප්‍රසිද්ධ බව ද එම නිවේදනයේ වැඩිදුරටත් සඳහන් වේ.

සැකකරු පසුගිය 27 වැනිදා අළුත්කඩේ අධිකරණ සංකීර්ණය තුළ අංක 05 මහේස්ත්‍රාත් අධිකරණයට ඉදිරිපත් කරන ලද අතර එහිදී ඇප මත මුදා හැරීමට නියෝග කරන ලදී.

කෙසේවෙතත්, ඇප කොන්දේසි සපුරාලීමට අපොහොසත් වීමෙන් පසු ඔහු තවදුරටත් රක්ෂිත බන්ධනාගාර ගත කරන ලදී.

වැඩිදුර පරීක්ෂණවලින් හෙළි වී ඇත්තේ සැකකරු වසර ගණනාවක් තිස්සේ මීට සමාන ජාවාරම් කටයුතුවලට සම්බන්ධ වී ඇති බවත්, ඔහුට එරෙහිව මහනුවර අධිකරණයේ නඩු කිහිපයක් පවතින බවත්ය.