මතභේදාත්මක ගල් අඟුරු තොග ආනයනයට අදාළ ක්‍රියාවලියේ නියැලී සිටි ලංකා ගල් අඟුරු (පෞද්ගලික) සමාගමේ හිටපු සභාපතිවරයා යටිතල පහසුකම් සහ උපායමාර්ගික සංවර්ධනය පිළිබඳ ආංශික අධීක්ෂණ කමිටුව ඉදිරියට කැඳවීමට එම කමිටුව තීරණය කර තිබේ.

පාර්ලිමේන්තු මන්ත්‍රී එස්.එම්. මරික්කාර්ගේ සභාපතිත්වයෙන් යුතු එම කමිටුව මෑතකදී පාර්ලිමේන්තුවේදී රැස්වූ අවස්ථාවේදී මෙම තීරණය ගෙන ඇත.

විදුලිබල උත්පාදනය සඳහා ශ්‍රී ලංකාවට ආනයනය කරන ලද ගල් අඟුරු සම්බන්ධ කරුණු යටිතල පහසුකම් සහ උපායමාර්ගික සංවර්ධනය පිළිබඳ ආංශික අධීක්ෂණ කමිටුවේදී පරීක්ෂා කරන ලදී.

විදුලිබල හා බලශක්ති අමාත්‍යාංශයේ සහ ලංකා ගල් අඟුරු (පෞද්ගලික) සමාගමේ නිලධාරීන් කමිටු රැස්වීමට සහභාගී වන ලෙස කැඳවන ලදී.

රැස්වීම අතරතුර, ගල් අඟුරු ආනයන ක්‍රියාවලියේදී අනුගමනය කරන ලද ක්‍රියාපටිපාටි පිළිබඳ කමිටුව නිලධාරීන්ගෙන් පැහැදිලි කිරීම් ඉල්ලා සිටියේය.

මෑත කාලීන ගල් අඟුරු ආනයනයේදී අනුගමනය කරන ලද ක්‍රියාපටිපාටි කෙරෙහි විශේෂ අවධානයක් යොමු කරන ලද අතර, මේ සම්බන්ධයෙන් නිලධාරීන්ගෙන් විස්තරාත්මකව ප්‍රශ්න කරන ලදී.

මෑතකදී මෙරටට ආනයනය කරන ලද ගල් අඟුරුවල ගුණාත්මකභාවය සම්බන්ධයෙන් කිසියම් ගැටළුවක් මතු වී ඇත්දැයි කමිටු සභාපතිවරයා විමසීය.

ශ්‍රී ලංකාවට පැමිණි ගල් අඟුරු යාත්‍රා තුනක සාම්පල තත්ත්ව පරීක්ෂාව සඳහා ඉන්දියාවට යවා ඇති බවත්, අදාළ වාර්තා ලැබුණු පසු නිවැරදි තොරතුරු ලබා දිය හැකි බවත් නිලධාරීන් කමිටුවට දැනුම් දී තිබේ.

ශ්‍රී ලංකාවට පැමිණි යාත්‍රා තුනේ ගල් අඟුරුවල තත්ත්ව වාර්තා මෙන්ම මෑතකදී පැමිණි යාත්‍රාවේ අඩංගු ගල් අඟුරුවල ගුණාත්මකභාවය පිළිබඳ ශ්‍රී ලංකාවේ පවත්වන ලද රසායනාගාර වාර්තා ඊළඟ රැස්වීමේ දිනයේදීම කමිටුවට ඉදිරිපත් කරන ලෙස සභාපතිවරයා නිලධාරීන්ට උපදෙස් දුන්නේය.