හපුගස්තැන්න වැවිලි සමාගමට අයත් අක්කර පහක ඉඩමක් වසර 53ක බදු පදනම මත පෞද්ගලික සමාගමකට බදු දී ඇති බවට එල්ල වූ චෝදනාවකට අදාළව, ඒ සඳහා ව්‍යාජ ඔප්පු සකස් කිරීමේ සිද්ධියක් සම්බන්ධයෙන් අත්අඩංගුවට ගත් නීතිඥවරියක සහ පෞද්ගලික සමාගමක අධ්‍යක්ෂවරයකු අද කොළඹ ප්‍රධාන මහේස්ත්‍රාත් අසංග එස්. බෝදරගම විසින් ඇප මත මුදාහැර තිබේ.

ඒ, රුපියල් මිලියන 5 බැගින් වූ ශරීර ඇප දෙකක් මතය.

සැකකාරියට සහ සැකකරුට විදේශ ගමන් තහනමක් පැනවූ අධිකරණය, ඔවුන්ගේ විදේශ ගමන් බලපත්‍ර අධිකරණයට භාරදෙන ලෙස ද නියෝග කර තිබේ.

විමර්ශනයට සම්බන්ධ සාක්ෂිකරුවන්ට බාධා නොකරන ලෙස හෝ බලපෑම් නොකරන ලෙස ද ඔවුන්ට දැඩි ලෙස අවවාද කරන ලදී.

අධිකරණය හමුවේ කරුණු ඉදිරිපත් කරමින් මූල්‍ය අපරාධ විමර්ශන අංශයේ නිලධාරීන් ප්‍රකාශ කළේ රත්නපුර ප්‍රදේශයේ පිහිටි හපුගස්තැන්න වැවිලි සමාගමට අයත් අක්කර පහක ඉඩමක් ගැසට් නිවේදනයක් මගින් පෞද්ගලික සමාගමකට වසර 53ක බදු පදනම මත බදු දී ඇති බවයි.

එම ගැසට් නිවේදනයේ අන්තර්ගත විශේෂිත වාක්‍ය ඛණ්ඩයක් උපයෝගී කරගනිමින්, පෞද්ගලික සමාගමේ විධායක අධ්‍යක්ෂවරයා ඉඩමේ සහ එහි පිහිටි ගොඩනැගිල්ලේ අයිතිය නීතිවිරෝධී ලෙස ඉල්ලා සිටීමට පියවර ගෙන ඇති බව විමර්ශකයන් අධිකරණයට දැනුම්දී ඇත.

නීතිඥවරියගේ සහාය ඇතිව අධ්‍යක්ෂවරයා ඉඩමට අදාළ ව්‍යාජ ඔප්පුවක් සකස් කර වංචනික ගනුදෙනුව සිදු කර ඇති බවට ද චෝදනා එල්ල වී තිබේ.