විශාල රන් වංචාවකට සම්බන්ධ සැකකරුවකු විසින් සිදුකරන ලද වැරදි සම්බන්ධයෙන් ඕනෑම තොරතුරක් ලබාදෙන ලෙස ශ්‍රී ලංකා පොලිසිය මහජනතාවගෙන් ඉල්ලා සිටී.

කැලණිය, ලුවිස් මාවතේ පදිංචිකරුවකු රන් මිලදී ගැනීම සඳහා මුදල් ලබාගෙන ඒවා ලබානොදුන් බවට ලැබුණු චෝදනා මත 2025 පෙබරවාරි 11 වැනි දින අපරාධ පරීක්ෂණ දෙපාර්තමේන්තුව (CID) විසින් පරීක්ෂණයක් ආරම්භ කර තිබේ.

සැකකරු රත්තරන් කිලෝග්‍රෑම් 3½ ක් ලබාදිය හැකි බව පවසමින් රුපියල් මිලියන 50 ක් ලබාගෙන පසුව රත්තරන් ආලේප කරන ලද යකඩ කැබලි දෙකක් ලබා දී තමාව රවටා ඇති බව පැමිණිලිකරුවකු පවසා ඇත.

සැකකරු ජාතික හැඳුනුම්පත අංක 198621302653 දරන කුරුණෑගල, විල්බාව, 11 වන පටුමගෙහි පදිංචි ලොකුබඩතුරුගේ මහේෂ් වින්තක ද සිල්වා ලෙස හඳුනාගෙන ඇත.

විමර්ශනවලින් හෙළිව ඇත්තේ, ඔහු ව්‍යාජ හැඳුනුම්පතක් භාවිත කරමින් ශ්‍රී ලංකා නාවික හමුදාවේ ලුතිනන් කමාන්ඩර්වරයකු ලෙස පෙනීසිටිමින් ජනතාව රවටා ඇති බවයි.

2525 දෙසැම්බර් 23 වැනි දින අපරාධ පරීක්ෂණ දෙපාර්තමේන්තුව සැකකරු අත්අඩංගුවට ගෙන මහර මහේස්ත්‍රාත් අධිකරණයට ඉදිරිපත් කළ අතර පසුව ඔහු රක්ෂිත බන්ධනාගාරගත කරන ලදී.

මේ දක්වා මේ ආකාරයෙන් වංචා කිරීම සම්බන්ධයෙන් ඔහුට එරෙහිව පැමිණිලි දෙකක් වාර්තා වී ඇති අතර, ඔහු සමාන වැරදිවල නිරත වී ඇත්ද යන්න පිළිබඳව වැඩිදුර තොරතුරු රැස් කිරීමේ අවශ්‍යතාවය පොලිසිය අවධාරණය කරයි.

එබැවින්, අදාළ පැමිණිලි ඇති පුද්ගලයන් 03-011-2395371 හෝ 03-071-8594915 යන දුරකථන අංකවලට සම්බන්ධ කර ගන්නා ලෙස පොලිසිය මහජනතාවගෙන් ඉල්ලා සිටී.