නිල පොලිස් නිවාසවලින් ඉවත් කිරීමට සැලසුම් කිරීම සම්බන්ධයෙන් පොලිස් නිලධාරීන් පිරිසකගේ පවුල්වල සාමාජිකයන් පිරිසක් ජනාධිපති ලේකම් කාර්යාලයේ නිලධාරීන් සමඟ රැස්වීමක් ඉල්ලා තම ගැටළු පැහැදිලි කරමින් ජනාධිපති ලේකම් කාර්යාලය වෙත ලිපියක් භාර දී තිබේ.

පොලිස් නිවාසවල දැනට වාසය කරන පවුල්වලට දෙසැම්බර් 30 වැනිදාට පෙර තම නිවාසවලින් ඉවත්වන ලෙස උපදෙස් දෙමින් චක්‍රලේඛයක් නිකුත් කර ඇති බව මෙම කණ්ඩායම නියෝජනය කරන නීතිඥවරයෙක් පැවසීය.

“අපි එම නියෝගයට අභියෝග කරන්නේ නැහැ. නමුත් මෙම පවුල් බරපතළ දුෂ්කරතාවන්ට මුහුණ දී සිටිනවා. ඔවුන්ගේ දරුවන් තවම පාසල් යනවා. මෑත කාලීන ව්‍යසනය සහ සීමිත ආදායම එක්ක කෙටි දැනුම්දීමකින් විකල්ප නිවාස සොයා ගැනීම කළ නොහැකියි.” නීතිඥවරයා පැවසීය.

රැඳී සිටීම සඳහා කාලය දීර්ඝ කරන ලෙස ඉල්ලා සිටින මෙම පිරිස පවසන්නේ කොළඹ නගරයේ සාමාන්‍ය කුලී පිරිවැය රුපියල් 35,000 සිට රුපියල් 45,000 දක්වා වන අතර, මෙම පවුල් බොහොමයකට එය දැරිය නොහැකි බවයි.

“ඔවුන් හැම විකල්පයක්ම බලා අවසාන විසඳුම හැටියටයි ජනාධිපති කාර්යාලයට පැමිණියේ,” ඔහු පැවසුවේය.

මෙම තීරණයෙන් පවුල් 375ත් 400ත් අතර සංඛ්‍යාවක් පීඩාවට පත්ව ඇති බව ද ඔහු සඳහන් කළේය.

“මෙම පවුල්වල බාලම දරුවන් උසස් පෙළ විභාග අවසන් කරන තුරු නිවාසවල රැඳී ඉන්න ඉඩදෙන්න කියලා අපි ඉල්ලා සිටිනවා. බොහෝ පොලිස් නිලධාරීන්ගේ භාර්යාවන් අර්ධකාලීන රැකියාවල නිරත වන්නේ, මෙම තත්ත්වය නිසා දරුවන්ගේ ආරක්ෂාව සහතික කිරීම දුෂ්කර වෙනවා,” යනුවෙන් මාධ්‍ය වෙත අදහස් දක්වමින් පවුලේ සාමාජිකාවක් පැවසීය.

මේ වන විට ගෙවල් කුලී මිල ගණන් රුපියල් 60,000 සිට රුපියල් 70,000 දක්වා වන අතර එය ඔවුන්ගේ වැටුපට වඩා බෙහෙවින් වැඩි බව ඇය තවදුරටත් පැවසුවාය.