ගංවතුරෙන් පීඩාවට පත් වූ ජනතාවට හදිසි වෛද්‍ය ප්‍රතිකාර ලබා දීම වෙනුවෙන් ජපානයේ ආපදා සහන කණ්ඩායම හලාවත පොලිස් ක්‍රීඩාංගණයේ අංගසම්පූර්ණ ජංගම ක්ෂේත්‍ර රෝහලක් ස්ථාපිත කර තිබේ.

මෙම මධ්‍යස්ථානය දෙසැම්බර් 15 වැනිදා දක්වා ක්‍රියාත්මක වේ.

සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස ඊයේ (12) එම රෝහල පරීක්ෂා කළ අතර හදිසි අවස්ථාවකදී දැක්වූ කඩිනම් ප්‍රතිචාරය සඳහා ජපාන රජයට සහ ජපානයේ ආපදා සහන කණ්ඩායමට ශ්‍රී ලංකාවේ කෘතඥතාව පළ කළේය.

දෙසැම්බර් 4 වැනිදා සිට ක්‍රියාත්මක වන මෙම ක්ෂේත්‍ර රෝහල පෙ.ව. 9:00 සිට ප.ව. 7:00 දක්වා දිනපතා සේවාවන් සපයන අතර දිනකට රෝගීන් 100කට වැඩි පිරිසකට ප්‍රතිකාර කරයි.

එය හලාවත සහ අවට ප්‍රදේශවල පදිංචිකරුවන්ට සේවය ලබාදෙන අතර, හලාවත දිස්ත්‍රික් මහ රෝහල ගංවතුරෙන් අර්ධ වශයෙන් බලපෑමට ලක්වීම නිසා එමගින් සපයන සේවාවන්ට අතිරේකව මෙම සේවාව සපයයි.

සෞඛ්‍ය අමාත්‍යාංශය සමඟ සම්බන්ධීකරණයෙන් පිහිටුවන ලද මෙම ක්ෂේත්‍ර රෝහල, අවතැන් වූ හෝ ව්‍යසනයෙන් පීඩාවට පත් වූවන්ගේ අත්‍යවශ්‍ය සෞඛ්‍ය සේවා සැපයීම සහතික කරයි.

අර්බුදකාරී කාලවලදී ජපානයේ දිගුකාලීන සහයෝගය වෛද්‍ය ජයතිස්ස සිහිපත් කළ අතර, ජපානයේ ආපදා සහන කණ්ඩායමේ කඩිනම් පැමිණීම සහ කාර්යක්ෂම වෛද්‍ය සේවාවන් රටේ සුවවීමේ උත්සාහයන් සඳහා ඉතා වැදගත් බව සඳහන් කළේය.

මෙම අවස්ථාවට ශ්‍රී ලංකාවේ ජපන් තානාපති අකියෝ ඉසෝමාටා, ශ්‍රී ලංකාවේ ලෝක සෞඛ්‍ය සංවිධාන නියෝජිත වෛද්‍ය රාජේෂ් සම්භාජිරාඕ පාණ්ඩව්, ජ්‍යෙෂ්ඨ සෞඛ්‍ය නිලධාරීන් සහ පළාත් පාලන ආයතන නියෝජිතයන් සහභාගී වී තිබිණි.

ජපානයේ ආපදා සහන කණ්ඩායමට විශේෂඥ වෛද්‍යවරුන්, හෙදියන්, ඖෂධවේදීන් සහ රසායනාගාර තාක්ෂණවේදීන් ඇතුළු වෛද්‍ය නිලධාරීන් 31 දෙනෙකු ඇතුළත් වන අතර සැපයුම් සහ සම්බන්ධීකරණය හසුරුවන සාමාජිකයන් 15 දෙනෙකුගෙන් යුත් සහායක කණ්ඩායමක් ද සිටී.