ව්‍යසනයෙන් විනාශ වූ ක්ෂුද්‍ර, කුඩා හා මධ්‍ය පරිමාණ ව්‍යවසායකත්ව පුනර්ජීවනය කිරීම සඳහා ‘RE-MSME – ආපදා සහන’ නමින් නව ණය යෝජනා ක්‍රමයක් ක්‍රියාත්මක කිරීමට රජය තීරණය කර තිබේ.

කාර්මික හා නිෂ්පාදන අංශයේ ආයෝජන සඳහා SMILE – III ණය යෝජනා ක්‍රම, පරිසර හිතකාමී මූල්‍යකරණය සඳහා E – FRIEND – II ණය යෝජනා ක්‍රම සහ රාජ්‍ය මූල්‍යකරණය යටතේ ක්‍රියාත්මක වන ක්ෂුද්‍ර, කුඩා හා මධ්‍ය පරිමාණ ව්‍යවසායකත්ව අංශය පුනර්ජීවනය කිරීම සඳහා ණය යෝජනා ක්‍රම ඒකාබද්ධ කරමින් මෙය සිදුකරනු ඇත.

ඒ අනුව, ලබන වසරේ සිට ‘RE–MSME PLUS’ ණය යෝජනා ක්‍රමය හඳුන්වා දීමේ යෝජනාවට අමාත්‍ය මණ්ඩලය අනුමැතිය ලබා දී තිබිණි.

ආසන්න වශයෙන් ව්‍යවසායකයන් 130,000ක් සඳහා ක්ෂණික හා මධ්‍ය පරිමාණ මූල්‍ය සහන ක්‍රියාමාර්ග හඳුන්වා දීමට අපේක්ෂා කෙරේ.

යෝජිත යෝජනා ක්‍රමය යටතේ, රජය විසින් වසර තුනක කාලයක් සඳහා අවශ්‍ය අරමුදල් වාර්ෂිකව 3%ක පොලී අනුපාතයක් යටතේ ලබා දීමට අපේක්ෂා කරන අතර, උපරිම සහන කාලය මාස හයක් වේ.

ක්ෂුද්‍ර ව්‍යවසායන් සඳහා ලබාදෙන උපරිම අරමුදල රුපියල් 250,000ක් සහ කුඩා හා මධ්‍ය පරිමාණ ව්‍යවසායන් සඳහා රුපියල් 1,000,000කි.

ඒ අනුව, ‘RE–MSME PLUS’ ණය යෝජනා ක්‍රමය සහ RE–MSME– ආපදා සහන ණය යෝජනා ක්‍රමය ක්‍රියාත්මක කිරීම සඳහා මුදල් අමාත්‍යවරයා ලෙස ජනාධිපතිවරයා විසින් ඉදිරිපත් කරන ලද යෝජනාවට අමාත්‍ය මණ්ඩලය අනුමැතිය ලබා දුන්නේය.