පොලිස් මත්ද්‍රව්‍ය නාශක කාර්යාංශය මුදල් විශුද්ධිකරණය වැළැක්වීමේ පනත යටතේ ගොනු කරන ලද පැමිණිල්ලකට අනුව, හම්බෙගමුව, තණමල්විල ප්‍රදේශයේ 52 හැවිරිදි මත්ද්‍රව්‍ය ජාවාරම්කරුවකු විසින් අත්පත් කරගත් බව කියන දේපළ සම්බන්ධයෙන් නීති විරෝධී වත්කම් විමර්ශන අංශය පරීක්ෂණ ආරම්භ කර තිබේ.

මත්ද්‍රව්‍ය ළඟ තබා ගැනීම සහ මත්ද්‍රව්‍ය ජාවාරම සම්බන්ධයෙන් සැකකරුට පෙර වාර්තා ඇති බවත්, රට පුරා පොලිස් ස්ථාන කිහිපයක් විසින් ඔහු අත්අඩංගුවට ගෙන අධිකරණයට ඉදිරිපත් කර ඇති බවත් පොලිසිය පැවසීය.

නීති විරෝධී මත්ද්‍රව්‍ය ආශ්‍රිත ක්‍රියාකාරකම්වලින් උපයාගත් මුදල් භාවිත කරමින් සැකකරු සිය බිරිඳගේ නමින් දේපළ ගණනාවක් මිලදී ගෙන ඇති බව විමර්ශනයෙන් හෙළි වී තිබේ.

අධිකරණයට ඉදිරිපත් කරන ලද කරුණු මත පදනම්ව, ඇඹිලිපිටිය සහ තංගල්ල මහාධිකරණ විසින් පවතින වත්කම් අත්හිටුවීමේ නියෝග 2025 දෙසැම්බර් 11 සිට තවත් දින හතක් සඳහා දීර්ඝ කර ඇත.

තහනම් කළ දේපළවලට ඇතුළත් වන්නේ:

* ඇඹිලිපිටියේ මිලියන 3 ක් වටිනා ෆාමසියක්

* ඇඹිලිපිටියේ රුපියල් මිලියන 70ක් වටිනා පර්චස් 39.5ක ඉඩමක් සහ හෝටලයක්.

* මිද්දෙනියේ රුපියල් මිලියන 15 ක් වටිනා ඉඩමක් සහ සාප්පු දෙකකින් සමන්විත ගොඩනැගිල්ලක්

* මිද්දෙනියේ ඉඩමක් සහ සාප්පු දෙකකින් සමන්විත ගොඩනැගිල්ලක්

* මිද්දෙනියේ රුපියල් මිලියන 7.5 ක් වටිනා තවත් ඉඩමක් සහ සාප්පු ගොඩනැගිල්ලක්

* ඇඹිලිපිටිය, කීරවලකටුව ප්‍රදේශයේ රුපියල් මිලියන 35 ක් වටිනා පර්චස් 25 ක ඉඩමක් සහ මහල් දෙකකින් යුත් නිවසක්

* මිද්දෙනියේ, පනාමුර පාරේ පිහිටි රුපියල් මිලියන 15 ක් වටිනා දෙමහල් ගොඩනැගිල්ලක් සහිත වාණිජ දේපළක්

නීති විරෝධී ලෙස අත්පත් කරගත් වත්කම් රජයට පවරා ගැනීම සඳහා නීතිමය කටයුතු සිදුවෙමින් පවතින බව පොලිසිය සඳහන් කළේය.

නීති විරෝධී ක්‍රම මගින් ලබා ගත් බවට විශ්වාස කෙරෙන සියලුම දේපළ සම්බන්ධයෙන් නීති විරෝධී වත්කම් විමර්ශන අංශය පොලිස්පතිවරයාගේ උපදෙස් හා අධීක්ෂණය යටතේ ක්‍රියා කරමින් අඛණ්ඩව පරීක්ෂණ පවත්වයි.