දිත්වා සුළි කුණාටුවෙන් ඇති වූ ගංවතුරෙන් පීඩාවට පත් ගොවිපොළවල සිටින සතුන්ට ප්‍රතිකාර කිරීම සඳහා රජයේ පශු වෛද්‍ය නිලධාරීන්ගේ සංගමය මන්නාරමේදී අද සිට දින තුනක ජංගම සායනයක් ආරම්භ කරන බව එම සංගමයේ සභාපති වෛද්‍ය උපුල් රංජිත් කුමාර පැවසීය.

දිස්ත්‍රික්කයේ ඇති වූ දරුණු ගංවතුරෙන් අවදානමට ලක් වූ පශු සම්පත් ගොවීන්ට සහාය වීම මෙහි අරමුණ බව ඔහු සඳහන් කර තිබේ.

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය, සත්ව නිෂ්පාදන හා සෞඛ්‍ය දෙපාර්තමේන්තුව සහ රජයේ පශු වෛද්‍ය නිලධාරීන්ගේ සංගමයේ සහාය ඇතිව මෙම වැඩසටහන ක්‍රියාත්මක කරයි.

“බලපෑමට ලක් වූ ගොවිපොළවල් සොයා ගැනීම සඳහා මන්නාරමේ විවිධ ගම්මානවලට කණ්ඩායම් අටක් යොදවනවා. ප්‍රතිකාර සඳහා සතුන් රැගෙන ඒමට පදිංචිකරුවන් දිරිමත් කරනවා. මහජනතාව දැනුවත් කිරීම සඳහා ප්‍රදේශයේ නිවේදන නිකුත් කරන්න ඉන්නේ,” වෛද්‍ය කුමාර පැවසීය.

ගංවතුර හේතුවෙන් බොහෝ සතුන්ට තණබිම් සඳහා ප්‍රවේශ වීමට ඇති හැකියාව නැති වූ බැවින්, ගව ආහාර මෙට්‍රික් ටොන් 250ක් දැනටමත් මන්නාරමට යවා ඇති බව ඔහු පැවසීය.

“තත්ත්වය යහපත් වන තුරු ගොවීන්ට තම සතුන් පෝෂණය කර තබා ගැනීමට මෙම ගව ආහාර තොගය උපකාරී වෙයි කියලා හිතනවා,” යනුවෙන් ඔහු පැවසීය.

තණබිම් හිඟය දිස්ත්‍රික්කයේ ගවයන් සඳහා ආහාර අර්බුදයක් නිර්මාණය කර තිබේ.