අල්ලස් හෝ දූෂණ විමර්ශන කොමිෂන් සභාව විසින් තමාට එරෙහි නඩුව ඉල්ලා අස්කර ගැනීම සම්බන්ධයෙන් සතුටු වන බව හිටපු මහ බැංකු අධිපති අජිත් නිවාඩ් කබ්රාල් පවසයි.

ජනමාධ්‍ය වෙත අදහස් දක්වමින් ඔහු පවසන්නේ, 2011 දී ග්‍රීක ස්වෛරී බැඳුම්කරවල මහ බැංකුවේ මතභේදාත්මක ආයෝජනය සම්බන්ධයෙන් ඔහුට එරෙහිව ගොනුකර තිබූ අල්ලස් නඩුව ඔස්සේ තමාට එරෙහිව පිළිගත නොහැකි චෝදනා එල්ලකර තිබූ බවයි.

“මෙම චෝදනාවෙන් බොහෝ දෙනෙක් මට දැවැන්ත මානසික පීඩනයක් එල්ල කිරීමට උත්සාහ කළා. නමුත් එය මට බලපෑවේ නැහැ. අධිකරණ ක්‍රියාවලිය ගැන මට විශ්වාසයක් තිබුණා, නඩුව ඉල්ලා අස්කර ගැනීම ගැන මම සතුටු වෙනවා. අපට නිදහස ලැබෙන බව මම දැනසිටියා”.

කෙසේවෙතත්, අල්ලස් හෝ දූෂණ චෝදනා විමර්ශන කොමිසම පවසන්නේ, අල්ලස් පනතේ දක්වා ඇති දැඩි කොන්දේසි යටතේ නඩුව ඉල්ලා අස්කර ගෙන ඇති බවයි. කබ්රාල් ජනමාධ්‍යයට කළ කතාවේදී මෙම කොන්දේසි ගැන කිසිදු සඳහනක් නොකළේය.

නඩුවේ පළමු විත්තිකරු වන කබ්රාල් විසින් අල්ලස් පනතේ 67(1) වගන්තිය යටතේ කරන ලද ඉල්ලීමකට අනුව කොළඹ මහාධිකරණය විසින් මෙම ඉල්ලා අස්කර ගැනීමට අවසර දෙන ලදී.

67(2) වගන්තිය යටතේ සමාලෝචනයකින් පසුව, අල්ලස් කොමිසමේ අධ්‍යක්ෂ ජනරාල්වරයා, කොමිසමේ අනුමැතිය ඇතිව, 67(3) වගන්තිය යටතේ රජයට සිදු වූ බව කියන පාඩුව සඳහා වන්දි වශයෙන් රු. 1,843,267,595.65ක් ගෙවීමේ කොන්දේසිය මත මෙම නඩුව ඉල්ලා අස්කරගැනීම සිදුකර ඇත.

2025 දෙසැම්බර් 10 වැනි දින සිට මාස තුනක් ඇතුළත නම් කරන ලද මහබැංකු ගිණුමකට මෙම මුදල තැන්පත් කළ යුතුය.

නියමිත කාල සීමාව තුළ ගෙවීම සිදු නොකිරීම හේතුවෙන් 67(5) වගන්තිය යටතේ චෝදනා නැවත ගොනුකරනු ලබන බව අල්ලස් කොමිසම පැවසීය.

අපරාධ නඩු විධාන සංග්‍රහයේ 194(3) වගන්තිය යටතේ අනෙක් විත්තිකරුවන් සිව්දෙනාට එරෙහිව චෝදනා ඉල්ලා අස්කර ගන්නා ලද අතර, මහාධිකරණය ඔවුන් විධිමත් ලෙස නිදහස් කර ඇත.

විත්තිකරුවන් නිදොස් කොට නිදහස් කර ඇති බව හෝ නිර්දෝෂී බව ඔප්පු කර ඇති බවට ජනමාධ්‍ය වාර්තා සාවද්‍ය බව අල්ලස් කොමිසම ද අවධාරණය කළේය.

නඩුව ඉල්ලා අස්කර ගැනීම කොන්දේසි සහිත වන අතර, කොන්දේසි සපුරා නොමැති නම් නීතිමය ක්‍රියාමාර්ග නැවත ආරම්භ කළ හැකි බව කොමිසම පැවසීය.