November 23, 2025
උතුරු පළාත් පරිපාලනය සම්බන්ධ ඇතැම් ජ්‍යෙෂ්ඨ නිලධාරීන් සිය රාජකාරි නිසි පරිදි ඉටු නොකරන බවට උතුරු පළාත් ආණ්ඩුකාර සහ හිටපු දිස්ත්‍රික් ලේකම් එන්. වේදනායහන් චෝදනා කරයි.
කිලිනොච්චියේ දී පසුගිය සිකුරාදා (21) පැවති උත්සවයක් අමතමින් ආණ්ඩුකාරවරයා පැවසුවේ, මධ්‍යම රජය උතුරේ සංවර්ධන ව්‍යාපෘති සඳහා අරමුදල් නිදහස් කිරීමට කැමැත්තෙන් සිටියත්, ඇතැම් ජ්‍යෙෂ්ඨ පළාත් ලේකම්වරුන් ඒවා ක්‍රියාත්මක කර මහජනතාවට සේවය කිරීමට කැමති නැති බවයි.
ඔවුන් බිම් මට්ටමේ ප්‍රගතියක් ලබා නොදී තම ආසනවලට ඇලී වරප්‍රසාද භුක්ති විඳිමින් සිටින බවත් පළාත් පාලන ආයතනවල ඉහළ තනතුරුවල සිටින ජ්‍යෙෂ්ඨ නිලධාරීන් ප්‍රසිද්ධියේ විවේචනය කරමින් ඔහු සඳහන් කළේය.
“ඔවුන් අවධානය යොමු කරලා තියෙන්නේ මහජන අරමුදල්වලින් තමන්ට ලැබෙන සියලුම ප්‍රතිලාභ සහ වරප්‍රසාද ලබා ගැනීම ගැන පමණයි. එය ඉතා ලැජ්ජා සහගතයි,” ආණ්ඩුකාරවරයා පැවසුවේය.
ගැටුම්වලින් පීඩාවට පත් පළාතේ ප්‍රජාවන්ට සේවය කිරීමට ක්‍රියාශීලීව පියවර නොගන්නා නිලධාරීන් කෙරෙහි ඔහු තම කලකිරීම ද ප්‍රකාශ කළේය.
පීඩාවට පත් ප්‍රජාවන්ගේ දුක්ඛිත තත්ත්වය පෙන්වා දෙමින්, උතුරේ රාජ්‍ය නොවන සංවිධානවල ක්‍රියාකාරිත්වය පිළිබඳ ද ආණ්ඩුකාරවරයා ප්‍රශ්න කළේය.
බලපෑමට ලක් වූ ප්‍රජාවන්ට සේවය කරන බව පවසමින් ඇතැම් රාජ්‍ය නොවන සංවිධාන අරමුදල් ලබා ගත්තද එවැනි අරමුදල්වලින් සැළකිව යුතු ප්‍රමාණයක් ‘ඔවුන්ගේම පරිපාලන වියදම් සඳහා’ යොදා ගත් බව ඔහු පැවසීය.
