ත්‍රස්තවාදය වැළැක්වීමේ පනත යටතේ දැනට රඳවාගෙන සිටින සංවිධානාත්මක අපරාධ සැකකරුවන් තවදුරටත් රඳවා තබා ගැනීමට සහ චෝදනා ගොනු කිරීම සඳහා වන පනත් කෙටුම්පතක් ලබන මාසයේ හඳුන්වා දීමට නියමිතය.

මෙම පනත් කෙටුම්පත ත්‍රස්තවාදය වැළැක්වීමේ පනත ප්‍රතිස්ථාපනය නොකකළ ද එය විශේෂයෙන් සංවිධානාත්මක අපරාධ ඉලක්ක කරමින් බලධාරීන්ට වැඩි බලතල ලබා දෙනු ඇත.

මත්ද්‍රව්‍ය ආශ්‍රිත වැරදි සහ අනෙකුත් සංවිධානාත්මක ක්‍රියාකාරකම්වලට සම්බන්ධ ප්‍රබල අපරාධකරුවන් දැනට ත්‍රස්තවාදය වැළැක්වීමේ පනත යටතේ රඳවාගෙන සිටී.

නව පනත් කෙටුම්පතේ අරමුණ ප්‍රශ්න කිරීම සඳහා ඔවුන් දිගු කාලයක් රඳවා තබා ගැනීමට බලධාරීන්ට ඉඩ සැලසීමයි.

ඒ අනුව නව පනත් කෙටුම්පත මගින් ප්‍රබල සැකකරුවන් දීර්ඝ කාලයක් රඳවා තබා ගැනීමට අවසර දෙනු ඇත.

යෝජිත නීතිය මඟින් කප්පම් ගැනීම් සහ මිනිස් ජාවාරම වැනි සංවිධානාත්මක අපරාධ සඳහා දැඩි දඬුවම් සහ දිගු සිර දඬුවම් නියම කරන අතරම, වැරදිකරුවන් වන අයගේ දේපළ සහ බැංකු ගිණුම් අත්පත් කර ගැනීමට ද ඉඩ සලසනු ඇත.

පනත් කෙටුම්පත මේ වන විට සූදානම් බවත් කැබිනට් අනුමැතිය ලබා ගැනීමෙන් පසු ලබන මාසයේ පාර්ලිමේන්තුවට ඉදිරිපත් කෙරෙන බවත් වාර්තා වේ.

මේ අතර, ශ්‍රී ලාංකික පුරවැසියන් මෙන්ම පුරවැසියන් නොවන අයට ද අදාළවන පරිදි මුහුදු ප්‍රදේශවල භයානක මත්ද්‍රව්‍ය නිෂ්පාදනය, ළඟ තබා ගැනීම හෝ ප්‍රවාහනය කිරීම තහනම් කිරීම සඳහා රජය විසින් විෂ, අබිං සහ භයානක මත්ද්‍රව්‍ය ආඥා පනතට සහ අධිකරණ පනතට සංශෝධන ගැසට් කර ඇත.

අධිකරණ පනත සංශෝධනය කිරීම මගින්, විෂ, අබිං සහ භයානක ඖෂධ ආඥා පනත (218 වන පරිච්ඡේදය), 2008 අංක 1 දරන මත්ද්‍රව්‍ය සහ මනෝචිකිත්සක ද්‍රව්‍ය නීති විරෝධී ප්‍රවාහනයට එරෙහි සම්මුති පනත මෙන්ම මුහුදු කොල්ලකෑම් විරෝධී නීති යටතේ මහ මුහුදේදී ඕනෑම පුද්ගලයකු විසින් සිදු කරන ලද වරදක් සම්බන්ධයෙන් සියලුම නඩු පැවරීම් සහ අධිචෝදනා පත්‍ර සඳහා විධිවිධාන සලසා ඇත.