මත්ද්‍රව්‍ය උවදුර තුරන් කිරීමේ අරමුණින් ඔක්තෝබර් 30 වැනිදා ආරම්භ කරන ලද ‘රටම එකට – ජාතික මෙහෙයුම’ යටතේ මේ දක්වා මත්ද්‍රව්‍ය විශාල ප්‍රමාණයක් අත්අඩංගුවට ගෙන තිබේ.

පොලිස් මාධ්‍ය අංශය නිකුත් කළ නිවේදනයක දැක්වෙන්නේ ඊයේ (20) වන විට දිවයින පුරා සිදු කරන ලද වැටලීම් 23,891කින් පසු සැකකරුවන් 23,550ක් අත්අඩංගුවට ගෙන ඇති බවයි.

මෙහෙයුම් අතරතුර අත්අඩංගුවට ගත් සැකකරුවන් 26 දෙනෙකුට අදාළ නීති විරෝධී වත්කම් සම්බන්ධයෙන් ද බලධාරීන් විමර්ශන ආරම්භ කර තිබේ.

මේ අතර, මෙම මෙහෙයුම් අතරතුර, සැකකරුවන් 614 දෙනෙකුට එරෙහිව පොලිසිය රැඳවුම් නියෝග ලබාගෙන ඇති අතර, සැකකරුවන් 638 දෙනෙකු පුනරුත්ථාපනය සඳහා යොමු කර ඇති බව පොලිස් මාධ්‍ය අංශය නිකුත් කළ නිවේදනයේ දැක්වේ.

ඔක්තෝබර් 30 සිට නොවැම්බර් 20 දක්වා සිදු කරන ලද වැටලීම්වලදී, හෙරොයින් කිලෝග්‍රෑම් 133යි ග්‍රෑම් 910ක්, ස්ඵටික මෙතම්ෆෙටමින් හෙවත් අයිස් මත්ද්‍රව්‍ය කිලෝග්‍රෑම් 650යි ග්‍රෑම් 880ක්, ගංජා කිලෝග්‍රෑම් 553යි ග්‍රෑම් 900ක්, ‘මාවා’ කිලෝග්‍රෑම් 59යි ග්‍රෑම් 243ක්, හෂිෂ් කිලෝග්‍රෑම් 32යි ග්‍රෑම් 282ක් සහ ‘මදන මෝදක’ කිලෝග්‍රෑම් 13යි ග්‍රෑම් 328ක් අත්අඩංගුවට ගෙන ඇති බව පොලිස් මාධ්‍ය අංශය පවසයි.

මීට අමතරව, අපරාධ ක්‍රියාකාරකම්වලට සෘජුවම සම්බන්ධ පුද්ගලයන් 16 දෙනෙකු පොලිසිය හඳුනාගෙන ඇති අතර, මත්පැන් පානය කර රිය පැදවීම සම්බන්ධයෙන් රියදුරන් 16 දෙනෙකු අත්අඩංගුවට ගෙන ඇති බව පොලිසිය සඳහන් කළේය.