පාකිස්තානයේ රැඳීසිටිමින් තරගාවලිය ක්‍රීඩා කිරීමට ගත් නිවැරදි තීරණය සම්බන්ධයෙන් ශ්‍රී ලංකා කණ්ඩායමේ හිටපු ක්‍රිකට් ක්‍රීඩක සිදත් වෙත්තමුණි ජාතික කණ්ඩායමට ප්‍රශංසා කර තිබේ.

තරගාවලිය පුරාම ශ්‍රී ලංකා කණ්ඩායමට ජනාධිපති මට්ටමේ ආරක්ෂාව ලබාදෙන බවට පාකිස්තාන බලධාරීන් සහතික වී තිබේ.

NewsWire පුවත් සේවය වෙත අදහස් දක්වමින් සිදත් වෙත්තමුණි පවසා ඇත්තේ, රටේ ක්‍රිකට් ඉතිහාසයේ වඩාත්ම අභියෝගාත්මක මොහොතකදී පාකිස්තානය ලබාදුන් සහයෝගය ශ්‍රී ලංකාව කිසිවිටෙකත් අමතක නොකළ යුතු බවයි.

“ශ්‍රී ලංකා කණ්ඩායම රැඳීසිටීම ගැන මම සතුටු වෙනවා. 1996 ලෝක කුසලානයේදී පාකිස්තානය අපට දුන් සහයෝගය අපට අමතක කළ නොහැක,” ඔහු පවසා ඇත.

1996 තරඟාවලිය අතරතුර, ඕස්ට්‍රේලියාව සහ බටහිර ඉන්දීය කොදෙව්වන් එවකට ආරක්ෂක ගැටළු හේතුවෙන් ශ්‍රී ලංකාවේ ක්‍රීඩා කිරීම ප්‍රතික්ෂේප කළහ.

ඊට ප්‍රතිචාර වශයෙන්, පාකිස්තානය සහ ඉන්දියාව ඒකාබද්ධ කණ්ඩායමක් කොළඹට එවා ප්‍රදර්ශන තරඟයක් පවත්වා සහයෝගය දක්වමින්, ශ්‍රී ලංකාවට ලෝක කුසලාන තරඟ පැවැත්වීමට හැකියාව ඇති බව පෙන්වීමට කටයුතු කළේය.

“1996 දී හැමෝම ආපසු හැරී යන විට, පාකිස්තානය සහ ඉන්දියාව අපව බේරාගත්තා. ඔවුන් අපට අතිශයින්ම කරුණාවන්ත වුණා. මේ දුෂ්කර කාලයේදී අපි ඔවුන්ට සහාය දීම නිවැරදියි” යනුවෙන් සිදත් වෙත්තමුණි තවදුරටත් පවසයි.

සංචාරය අඛණ්ඩව පවත්වාගෙන යාම රටවල් දෙක අතර දිගුකාලීන ක්‍රිකට් මිත්‍රත්වය පිළිබිඹු කරන බව ඔහු සඳහන් කරයි.

“සංචාරය ආරම්භ වීම ගැන මම සතුටු වෙනවා. නිවැරදි තීරණය ගෙන තිබෙනවා,” ඔහු වැඩිදුරටත් පවසයි.