ශ්‍රී ලංකාවේ උපත ලැබූ බෞද්ධ භික්ෂුවකට ඕස්ට්‍රේලියාවේදී බාලවයස්කාර දැරියන් හයදෙනකුට ලිංගික අපයෝජන සිදුකිරීම සම්බන්ධයෙන් වසර 13යි මාස 2ක සිර දඬුවමක් නියම කර තිබේ.

මෙල්බර්න් නගරයේ දකුණු-නැගෙනහිර ප්‍රදේශයේ පිහිටි ධම්ම සරණ විහාරස්ථානයේ ප්‍රධාන භික්ෂුව ලෙස කටයුතු කළ 71 හැවිරිදි නාඋටුන්නේ විජිත භික්ෂුවට මෙම දඬුවම නියම කර ඇත්තේ වික්ටෝරියා ප්‍රාන්ත අධිකරණය විසිනි. ABC News Australia වාර්තා කළ පරිදි, මෙම දඬුවම බ්‍රහස්පතින්දා (8) ප්‍රකාශයට පත්කර තිබේ.

විනිසුරු පර්දීප් තිවානා සඳහන් කර ඇත්තේ, මෙම අපරාධ බරපතළ ලෙස විශ්වාසය පාවාදීමක් බවයි. ශ්‍රී ලාංකික බෞද්ධ ප්‍රජාව තුළ තමන්ට හිමි වූ ගෞරවනීය තනතුර විජිත භික්ෂුව විසින් අපයෝජනය කර ඇති බවද විනිසුරුවරයා පෙන්වා දී තිබේ.

2025 වසරේදී විජිත භික්ෂුව වැරදිකරු බවට තීන්දු කර තිබුණේ චෝදනා 17කටය. ඒ අතරට ළමයකු සමඟ ලිංගික සම්බන්ධතාවක් පැවැත්වීම සම්බන්ධ චෝදනා 9ක් සහ ළමයකු සම්බන්ධයෙන් අසභ්‍ය ක්‍රියාවක් සිදුකිරීමේ චෝදනා 8ක් ඇතුළත් විය.

මෙම අපරාධ 1994 සිට 2002 දක්වා කාලය තුළ මෙල්බර්න්හි ස්ප්‍රිංවේල් සහ කීස්බරෝ ප්‍රදේශවල ක්‍රියාත්මක වූ විහාරස්ථානයේදී සිදුවී තිබේ.

අධිකරණයේදී හෙළිවී ඇත්තේ විජිත භික්ෂුව තරුණ දැරියන් තම නවාතැන් කාමර වෙත නැවත නැවතත් රැගෙන ගොස් ලිංගික අපයෝජනයට ලක්කර ඇති බවයි. ඇතැම් අවස්ථාවලදී ඔවුන්ගේ මාපියන් ආසන්න කාමරවල සිටියදී මෙම අපයෝජන සිදුවී ඇති බවද අධිකරණයට දැනුම් දී තිබේ.

මෙම දැරියන් සිය පවුල් සමඟ ආගමික කටයුතු සඳහා විහාරස්ථානයට පැමිණි අය වී තිබේ.

දඬුවම් නියම කිරීමේදී විනිසුරු තිවානා සඳහන් කර ඇත්තේ, විහාරස්ථානය තුළ තම දරුවන් ආරක්ෂිතව සිටිනු ඇතැයි විශ්වාස කළ මාපියන් විසින් විජිත භික්ෂුව වෙත තැබූ විශ්වාසය ඔහු විසින් අයුතු ලෙස ප්‍රයෝජනයට ගෙන ඇති බවයි.

මෙම අපරාධ හේතුවෙන් වින්දිතයන්ට දිගුකාලීන මානසික බලපෑම් ඇති වී ඇති බවද විනිසුරුවරයා පවසා තිබේ. ඇතැම් වින්දිතයන්ට බෞද්ධ ආගමික කටයුතු හා සම්බන්ධ අත්දැකීම් තවමත් මානසික පීඩාවක් ඇති කරන බවද අධිකරණයේදී සඳහන් වී ඇත.

අපයෝජනයට ලක්වූ කාන්තාවන් වසර ගණනාවකට පසුව පොලීසිය වෙත පැමිණිලි ඉදිරිපත් කර ඇති අතර, ඒ අනුව 2023 වසරේදී විජිත භික්ෂුවට චෝදනා ගොනුකර තිබේ.

නඩු විභාගයේදී විජිත භික්ෂුව චෝදනා ප්‍රතික්ෂේප කරමින් නිවැරදිකරු බව ප්‍රකාශ කර තිබිණි. භික්ෂුවගේ නීතිඥයන් තර්ක කර තිබුණේ අදාළ සිදුවීම් සිදුවී නොමැති බවත්, ඇතැම් පැමිණිලිකාරියන් පිළිබඳව ඔහුට මතකයක් නොමැති බවත්ය.

විජිත භික්ෂුවට නියම වූ සිරදඬුවමෙන් අවම වශයෙන් වසර 9යි මාස 4ක් ගතකිරීමෙන් පසුව පමණක් පරිවාස මත නිදහස් වීමට සුදුසුකම් ලැබෙනු ඇත.

ABC News වාර්තා කරන පරිදි, දඬුවම ප්‍රකාශයට පත්කිරීමෙන් අනතුරුව විජිත භික්ෂුව අධිකරණය තුළ සිටි තම ආධාරකරුවන් දෙස බලා සිනාසෙමින් අත වැනීම සම්බන්ධයෙන් වින්දිතයන් කිහිපදෙනකු දැඩි කෝපය පළකර තිබේ.

විජිත භික්ෂුව ශ්‍රී ලංකාවේ උපත ලබා ඇති අතර වයස අවුරුදු 15දී පැවිදි දිවියට ඇතුළත් වී ඇති බවද අධිකරණයේදී හෙළිවී තිබේ.

පසුව භික්ෂුව ස්වීඩනයට ගොස් එරට පුරවැසිභාවය ලබාගෙන ඇති අතර, 1994 වසරේදී ඕස්ට්‍රේලියාවට පැමිණ ධම්ම සරණ විහාරස්ථානයේ ප්‍රධාන භික්ෂුව ලෙස කටයුතු කර තිබේ.

සිරදඬුවම අවසන් කිරීමෙන් පසු විජිත හිමියන්ට ඕස්ට්‍රේලියාවෙන් පිටුවහල් කිරීමේ අවදානමක්ද පවතින අතර, තමන් නැවත ස්වීඩනයට යෑමට කැමැත්තෙන් සිටින බව භික්ෂුවගේ නීතිඥයන් අධිකරණයට දැනුම් දී තිබේ.

විජිත භික්ෂුවගේ සෞඛ්‍ය තත්ත්වය සම්බන්ධයෙන්ද ඔහුගේ නීතිඥයන් මීට පෙර කරුණු ඉදිරිපත් කර තිබූ අතර, භික්ෂුව ඩිමෙන්ෂියා රෝගයෙන් පෙළෙන බවටද කරුණු ඉදිරිපත් කර තිබිණි.

මෙම දඬුවම මගින් දශක දෙකකට වැඩි කාලයකට පෙර සිදුවූ අපරාධ සම්බන්ධ නඩු විභාග ක්‍රියාවලිය අවසන් වන නමුත්, විජිත භික්ෂුවට තවත් සැලකිය යුතු කාලයක් සිරගතව සිටීමට සිදුවනු ඇත.