චිත්‍රපට අධ්‍යක්ෂ සනත් අබේසේකරගේ නම භාවිත කරමින් කාන්තාවන්ගෙන් ලිංගික අල්ලස් ඉල්ලා සිටි බව කියන පුද්ගලයකු රක්ෂිත බන්ධනාගාර ගත කර තිබේ.

සැකකරු අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන කොළඹ කොටුව මහේස්ත්‍රාත්වරයා වෙත අද (12) ඉදිරිපත් කරන ලදී.

මෙම සැකකරු සනත් අබේසේකරගේ නමින් ව්‍යාජ ෆේස්බුක් ගිණුමක් නිර්මාණය කර, එය භාවිත කරමින් නිළියන් සම්බන්ධ කර ගනිමින්, චිත්‍රපටවල රඟපෑමට අවස්ථාව ලබා දිය හැකි බව පවසා මුදල් සහ ලිංගික අල්ලස් ඉල්ලා ඇති බව වාර්තා වේ.

මේ සම්බන්ධයෙන් සනත් අබේසේකර අපරාධ පරීක්ෂණ දෙපාර්තමේන්තුවට පැමිණිල්ලක් ගොනු කර ඇත.

ඒ අනුව, අත්අඩංගුවට ගත් සැකකරු නොවැම්බර් 17 වැනිදා දක්වා රක්ෂිත බන්ධනාගාර ගත කර ඇත.