දූෂණ ක්‍රියාවක් සම්බන්ධ විමර්ශනයකට අදාළව අත්අඩංගුවට ගැනුණු හිටපු අමාත්‍ය ප්‍රසන්න රණතුංගට ඊයේ ඇප ලැබීමට හේතුවී ඇත්තේ ඔහුගේ නීතිඥයන් ඉදිරිපත් කළ වෛද්‍ය හේතු සහ අල්ලස් කොමිසම විසින් නිසි පරිදි සාක්ෂි ඉදිරිපත්කර නොතිබීම හේතුවෙන් බව වාර්තා වේ.

2021 දී සංචාරක හා ගුවන් සේවා අමාත්‍යවරයා ලෙස කටයුතු කළ කාලය තුළ ශ්‍රී ලංකා රක්ෂණ සංස්ථාවට රුපියල් මිලියන 04කට අධික පාඩුවක් සිදු කිරීම සම්බන්ධයෙන් අල්ලස් කොමිසම ප්‍රසන්න රණතුංග අත්අඩංගුවට ගෙන තිබිණි.

කොළඹ ප්‍රධාන මහේස්ත්‍රාත් අධිකරණය හමුවේ ඊයේ පැවති ඇප විභාගයේ දී, රණතුංගට නිසි පරිදි ආහාර ගැනීමට නොහැකි වුවහොත් ඔහුගේ ජීවිතය අවදානමට ලක්විය හැකි බව ඔහුගේ නීතිඥවරයා අධිකරණයට දැනුම් දුන් බව වාර්තා වේ.

සැකකරුගේ නීතිඥවරයා කොළඹ ප්‍රධාන මහේස්ත්‍රාත්වරයාට දැනුම් දී ඇත්තේ ඔහු ශල්‍යකර්මයකට භාජනය වී ඇති අතර නිසි පරිදි ආහාර ගැනීමට නොහැකිව සිටින බවයි.

ඔහුට සෑම පැය හතරකට වරක් කුඩා ප්‍රමාණවලින් ආහාර ලබා දිය යුතු බවත්, විශේෂ ප්‍රෝටීන අතිරේකව අවශ්‍ය බවත්, එසේ නොවුවහොත් ඔහු කෝමා තත්ත්වයට පත්විය හැකි බවත් ඔහුගේ ජීවිතය අවදානමට ලක්විය හැකි බවත් ප්‍රකාශ වී තිබේ.

ඇප තීරණය කිරීමේදී මෙම වෛද්‍ය තත්වයන් සළකා බලන ලෙස නීතිඥවරයා අධිකරණයෙන් ඉල්ලා සිටියේය.

ඊට ප්‍රතිචාර දක්වමින්, “මේ අවස්ථාවේදී අධිකරණය නඩුවේ සුදුසුකම් ඇගයීමට ලක් කරන්නේ නැහැ, ඇප අයදුම්පත පමණයි සළකා බලන්නේ. අල්ලස් පනතේ 70 වැනි වගන්තිය යටතේ, චෝදනාවට ලක්වූ වරද මෙම අධිකරණය විසින් ඇප ලබා දිය හැකි වරදක්.” යනුවෙන් කොළඹ ප්‍රධාන මහේස්ත්‍රාත් අසංග එස්. බෝදරගම සඳහන් කළේය.

සැකකරු සාක්ෂිකරුවන්ට බලපෑම් කිරීමට උත්සාහ කළ බවට අල්ලස් කොමිසම වාචිකව ප්‍රකාශ කළද, එහි විස්තර විධිමත් වාර්තාවට ඇතුළත් කර නොමැති බවත්, අදාළ සාක්ෂිකරුවන්ගෙන් ප්‍රකාශ ලබාගෙන නොමැති බවත් මහේස්ත්‍රාත්වරයා තවදුරටත් නිරීක්ෂණය කළේය.

2022 දී විමර්ශනය ආරම්භ වූ දා සිට සැකකරු සාක්ෂිකරුවන්ට බලපෑම් කළ බවට කිසිදු සාක්ෂියක් නොමැති බව කොළඹ ප්‍රධාන මහේස්ත්‍රාත්වරයා තවදුරටත් පැවසීය.

ඒ අනුව, ප්‍රසන්න රණතුංග රුපියල් 100,000ක මුදල් ඇපයක් සහ රුපියල් 500,000 බැගින් වූ ශරීර ඇප දෙකක් මත මුදා හරින ලද අතර, අධිකරණය ඔහුට රටින් පිටවීම වැළැක්වීමේ සංචාරක තහනමක් ද පැනවීය.