මෙරට ස්ටෑන්ඩර්ඩ් චාර්ටඩ් බැංකුව සතු ධනය සහ සිල්ලර බැංකු ව්‍යාපාරය නියාමන අනුමැතියට යටත්ව රුපියල් බිලියන 3.7කට අත්පත් කර ගැනීම සඳහා ගිවිසුමකට එළඹ ඇති බව DFCC බැංකුව කොළඹ කොටස් වෙළඳපොළට දැනුම් දී තිබේ.

මෙම ගිවිසුම 2025 නොවැම්බර් 12 වැනිදා DFCC බැංකුව සහ එංගලන්තයේ ස්ටෑන්ඩර්ඩ් චාර්ටඩ් බැංකුව අතර අත්සන් කර ඇති අතර එය එම බැංකුවේ ශ්‍රී ලංකා ශාඛාව හරහා ක්‍රියාත්මක වේ.

මෙම ගනුදෙනුව යටතේ ස්ටෑන්ඩර්ඩ් චාර්ටඩ් බැංකුවේ ප්‍රමුඛතා බැංකුකරණය, ක්‍රෙඩිට් කාඩ්, සිල්ලර ණය දීම, තැන්පතු සහ කුඩා හා මධ්‍ය පරිමාණ ව්‍යාපාර ආදිය ආවරණය කරයි.

ශ්‍රී ලංකා මහ බැංකුවේ අනුමැතියෙන් පසු 2026 මුල් භාගය වන විට ගනුදෙනුව අවසන් කිරීමට අපේක්ෂා කෙරේ.

DFCC බැංකුව පැවසුවේ අත්පත් කර ගැනීමේ ක්‍රියාවලිය අභ්‍යන්තරව ජනනය වන අරමුදල් හරහා සපයා ගනු ලබන අතර මෙය බැංකුවේ සිල්ලර හා ධන කළමනාකරණ බලය ශක්තිමත් කිරීම සඳහා වන උපායමාර්ගික සංවර්ධන න්‍යාය පත්‍රයට අනුකූල වන බවයි.

ඒකාබද්ධ කිරීමේ ක්‍රියාවලියේදී ස්ටෑන්ඩර්ඩ් චාර්ටඩ් බැංකුව ශ්‍රී ලංකාවේ ගනුදෙනුකරුවන්ට සහ සේවකයන්ට බාධාවකින් තොර සංක්‍රාන්තියක් සහතික කරනු ඇත.

වසර 130කට වැඩි කාලයක් ශ්‍රී ලංකාවේ ක්‍රියාත්මක වන ස්ටෑන්ඩර්ඩ් චාර්ටඩ් බැංකුව, ධනය සහ සිල්ලර බැංකු අංශයෙන් ඉවත් වීමට ගත් තීරණය එම බැංකුවේ මෙහෙයුම් විධිමත් කිරීමට සහ විශාල පරිමාණයේ සහ උපායමාර්ගික වැදගත්කමක් ඇති වෙළඳපල කෙරෙහි අවධානය යොමු කිරීමට ගනු ලබන ගෝලීය උපාය මාර්ගයක පියවරක් බව සඳහන් කර තිබේ.