පසුගිය වසරේ පැවති ලංකා ප්‍රිමියර් ලීග් (LPL) ක්‍රිකට් තරඟාවලියට සහභාගී වූ ක්‍රිකට් ක්‍රීඩකයකුට තරඟ පාවාදීමකට බලපෑම් කිරීමේ චෝදනාවට ‘දඹුල්ල තන්ඩර්ස්’ කණ්ඩායමේ හිමිකරු වූ තමීම් රහ්මාන්ට කොළඹ මහාධිකරණය හමුවේ අද (12) අධිචෝදනා පත්‍රයක් භාර දෙන ලදී.

කොළඹ මහාධිකරණ විනිසුරු උදේෂ් රණතුංග ඉදිරියේ නඩුව කැඳවන ලද අවස්ථාවේ නීතිපතිවරයා විසින් අධිචෝදනා පත්‍රය විත්තිකරුට විධිමත් ලෙස භාර දෙනු ලැබිණි.

පසුව විත්තිකරු රුපියල් ලක්ෂ 2ක මුදල් ඇපයක් සහ රුපියල් මිලියන 10 බැගින් වූ ශරීර ඇප දෙකක් මත නිදහස් කිරීමට අධිකරණය නියෝග කළේය.

විත්තිකරු වෙනුවෙන් පෙනී සිටි ජනාධිපති නීතිඥ කාලිංග ඉන්දතිස්ස ප්‍රකාශ කළේ රහ්මාන් මීට පෙර නඩුව සම්බන්ධයෙන් අත්අඩංගුවට ගෙන රිමාන්ඩ් භාරයේ තබා පසුව ඇප මත මුදා හැර ඇති බවයි.

බ්‍රිතාන්‍ය පුරවැසිභාවය ඇති බංග්ලාදේශ ජාතිකයකු වන විත්තිකරු මෙම නඩුව හේතුවෙන් වසර එකහමාරකට වැඩි කාලයක් ශ්‍රී ලංකාවේ සිටින බවත්, එය ඔහුගේ පෞද්ගලික, පවුලේ සහ ව්‍යාපාරික කටයුතුවලට අහිතකර ලෙස බලපා ඇති බවත් ඔහු තවදුරටත් පැහැදිලි කළේය.

විත්තිකරු චෝදනාවලට වරද පිළිගෙන ඇති බවත් නඩුව කඩිනමින් අවසන් කිරීමට සූදානම් බවත් නීතිඥවරයා වැඩිදුරටත් පැවසීය.

මේ සම්බන්ධයෙන් රහ්මාන් නීතිපතිවරයාට වාචිකව සහ ලිඛිතව කරුණු ඉදිරිපත් කර ඇත.

නඩු කටයුතු අතරතුර, නීතිපතිවරයා වෙනුවෙන් පෙනී සිටි රජයේ නීතිඥවරයා ඉල්ලා සිටියේ විත්තිකරු විසින් ඉදිරිපත් කරන ලද කරුණු සම්බන්ධයෙන් නීතිපතිවරයාගේ ස්ථාවරය පැහැදිලි කිරීමට දිනයක් නියම කරන ලෙසයි.

ඒ අනුව, නඩුව 2025 දෙසැම්බර් 8 වැනිදා නැවත කැඳවීමට නියමිතය.