October 10, 2025
තරුණ කාන්තාවන්ට සිනමාවේ සහ රූපවාහිනියේ අවස්ථා ලබා දෙන බවට පොරොන්දු වෙමින් ප්‍රවීණ චිත්‍රපට අධ්‍යක්ෂ සෝමරත්න දිසානායක ලෙස පෙනී සිටිමින් ලිංගික අපයෝජන සහ මූල්‍ය වංචා සම්බන්ධයෙන් වරදකරු වූ පුද්ගලයකුට කොළඹ ප්‍රධාන මහේස්ත්‍රාත් අසංක එස්. බෝදරගම විසින් බරපතළ වැඩ සහිත මාස අටක සිර දඬුවමක් නියම කරන ලද අතර එය වසර දහයකට අත්හිටුවන ලදී.
පැමිණිලිකරුවන් වන්දි ඉල්ලා නොමැති බවත්, එබැවින් මෙම නඩුවේදී කිසිදු දඩයක් නියම නොකරන බවත් ප්‍රධාන මහේස්ත්‍රාත්වරයා සඳහන් කළේය.
සැකකරු පොල්ගහවෙල ප්‍රදේශයේ තැපැල් සේවකයෙකි.
සැකකරු වෙනුවෙන් පෙනී සිටි නීතිඥවරයා අධිකරණයෙන් ඉල්ලා සිටියේ සැකකරු වරද පිළිගෙන ඇති බැවින් රජයේ සේවයේ නැවත පිහිටුවීම සඳහා සළකා බැලිය හැකි නිසා ලිහිල් දඬුවමක් නියම කරන ලෙසයි.
මෙම ඉල්ලීමට ප්‍රතිචාර දක්වමින් මහේස්ත්‍රාත්වරයා සඳහන් කළේ රාජ්‍ය සේවයට විනයගරුක, ආදර්ශවත් සහ අවංක නිලධාරීන් අවශ්‍ය බවයි.
මෙම නඩුවේ පැමිණිල්ල අපරාධ විමර්ශන දෙපාර්තමේන්තුව (CID) හරහා ගොනු කර ඇත.
වරදකරුට තවත් පුද්ගලයකු ලෙස පෙනී සිටිමින් සමාජ මාධ්‍යවල අසභ්‍ය දේ පළ කිරීම සහ ලිංගික අපයෝජනය සිදු කිරීම සම්බන්ධයෙන් චෝදනා එල්ල විය.
වරදකරු අධිකරණයේදී ප්‍රසිද්ධියේ සමාව අයැදීම සහ ඔහුගේ වරද පිළිගැනීම සැළකිල්ලට ගනිමින් ලිහිල් දඬුවමක් නියම කළ බව ප්‍රධාන මහේස්ත්‍රාත්වරයා අවධාරණය කළ ද රජයේ සේවය සඳහා අනාගතයේදී සළකා බැලීමකට අවසර නැති බවත් නැවත අවධාරණය කළේය.
