කොළඹ නගරය, සංචාරකයන්ට පැය 72ක් දක්වා රැඳී සිටීමට දිරිගන්වන, සංක්‍රමණ නැවතුමක සිට සජීවී ගමනාන්තයක් බවට පරිවර්තනය කිරීමට සැලසුම් කරමින් සිටින බව, කොළඹ නගරාධිපති ව්‍රායි කැලි බල්තසාර් චීනයේ ක්වාන්ෂෝ හි පැවති අන්තර්ජාතික සේද මාවතේ නගර සන්ධානයේ වාර්ෂික මහා සභා රැස්වීමේදී පවසා ඇත.

චීන නොවන සාමාජික සහ නිරීක්ෂක නගර වෙනුවෙන් අදහස් දක්වමින් ඇය සංචාරක ව්‍යාපාරය, සංස්කෘතිය සහ බෙදාගත් මුලපිරීම් හරහා සම්බන්ධතා වර්ධනය කරන නවීන සේද මාවතක වැදගත්කම ඉස්මතු කර තිබේ.

යටිතල පහසුකම් වැඩිදියුණු කිරීම, උරුම මාර්ගෝපදේශ ක්‍රියාත්මක කිරීම සහ නරඹන්නන්ගේ අත්දැකීම් වැඩිදියුණු කිරීම සඳහා නිර්මාණය කර ඇති සංස්කෘතික හා විනෝදාත්මක ව්‍යාපෘති මාලාවක් ඇතුළුව සංචාරක ව්‍යාපාරය සඳහා කොළඹ නගරයේ දැක්ම එහිදී ඇය පැහැදිළි කර ඇත.

නගරාධිපති ව්‍රායි කැලී බල්තසාර් සමඟ එම්.එම්.සී. මොහොමඩ් ජවුෆර් සහ සංචාරක ප්‍රවර්ධන කාර්යාංශයේ නියෝජිතයන් එම අවස්ථාව සඳහා සහභාගී වූ අතර, අන්තර්ජාතික සංචාරක කටයුතු සඳහා ශ්‍රී ලංකාව ගන්නා සහයෝගී ප්‍රවේශය ඔවුහු අවධාරණය කර තිබේ.

සේද මාවතේ අනෙකුත් නගර සමඟ සබඳතා ගැඹුරු කිරීමට සහ බෙදාගත් අදහස් සංචාරකයන්ට සහ දේශීය ප්‍රජාවන්ට ප්‍රතිලාභ ලබාදෙන සංයුක්ත ක්‍රියාමාර්ග බවට පත්කිරීමට කොළඹ කැපවීම ද නගරාධිපතිවරිය එහිදී පැහැදිළි කර ඇත.