September 11, 2025
සෞඛ්‍ය හා ජනමාධ්‍ය අමාත්‍යාංශය විසින් නව වැඩපිළිවෙලක් යටතේ රාජ්‍ය ආයතන කාර්ය මණ්ඩල සහ එම පවුල්වල සාමාජිකයින්ගේ සුවතාවය වෙනුවෙන් පවත්වනු ලබන ‘ආරෝග්‍යා’ ජංගම සුව සායන වැඩසටහනේ පළමු වැඩසටහන ඊයේ(10) ශ්‍රී ලංකා පොලිස් දෙපාර්තමේන්තුවේ කාර්ය මණ්ඩලය සඳහා ගම්පහ දිස්ත්‍රික්කයේ සියලුම පොලිස් කොට්ඨාස කේන්ද්‍ර කර ගනිමින් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්සගේ ප්‍රධානත්වයෙන් ආරම්භ කෙරිණි.
සුවපත් රටක් උදෙසා ‘Healthy Sri Lanka’ යන තේමාව යටතේ පැවැති මෙම ‘ආරෝග්‍යා’ ජංගම සුව සායනය සඳහා කැලණිය, ගම්පහ, මීගමුව පොලිස් කොට්ඨාස වල පොලිස් ස්ථාන නියෝජනය කරමින් 600 කට අධික කාර්ය මණ්ඩලයක් එක්ව සිටියහ.
මෙම ජංගම සායනය තුළින් බටහිර වෛද්‍ය සායනය, අක්ෂි සායනය, දේහ ස්කන්ධ දර්ශකය පරීක්ෂා කිරීම, නිදර්ශක ලබාගැනීම, රසායනාගාර සේවා, රුධිර පීඩනය මැනීම, දන්ත සායනය, රුධිර සීනි පරීක්ෂාව, කොලස්ටරෝල් පරීක්ෂාව, ආයුර්වේද වෛද්‍ය සායනය, මානසික උපදේශක සේවා, ඖෂධ ලබාදීම, සහ පෝෂණවේදී උපදෙස් ලබාදීම ද සිදුකෙරිණි.
මෙම ජංගම සායනයෙන් හඳුනාගනු ලබන රෝගීන් වැඩිදුර ප්‍රතිකාර සඳහා රජයේ රෝහල් වෙත යොමුකිරීමට කටයුතු යොදා තිබූ අතර, කොළඹ ජාතික රෝහල, මීගමුව රෝහල ඇතුළු රෝහල්වල විශේෂඥ වෛද්‍ය, වෛද්‍ය, හෙද ඇතුළු කාර්ය මණ්ඩල සහභාගීත්වයෙන් ජංගම සායනය පැවැත්විණි.
සුවපත් රටක් උදෙසා ‘Healthy Sri Lanka’ වැඩසටහනේ එක් අංශයක් ලෙස ‘ආරෝග්‍යා’ ජංගම සුව සායන වැඩසටහන පෙන්වා දිය හැකි බව මෙහිදී පැවසූ අමාත්‍යවරයා, ඈත දුෂ්කර ප්‍රදේශවල ජනතාවගේ සෞඛ්‍ය ඉහළ නැංවිම සඳහා එම සායන වැඩසටහන ක්‍රියාත්මක කරන බව ද රාජ්‍ය සේවකයන් වෙනුවෙන් වන ‘ආරෝග්‍යා’ ජංගම සුව සායන වැඩසටහනේ ආරම්භය පොලිස් දෙපාර්තමේන්තුවෙන් මෙලෙස ආරම්භ කළ බව ද පෙන්වාදුන්නේය.
මෙම සායන ප්‍රථමව වැඩසටහන පොලිස් දෙපාර්තමේන්න්තු නිලධාරීන් වෙනුවෙන් ආරම්භ කිරීමට හේතු වූ කරුණු දෙකක් වන බවත්, ඒ අනුව මෙරට ලක්ෂ 16 කට ආසන්න රාජ්‍ය සේවකයන් අතරින් ඉතා ඉහළ කාර්යභාරයක් 84,000 ක් පමණ වන සේවක සංඛ්‍යාවකින් යුක්ත පොලිස් දෙපාර්තමේන්තුවට පැවරී ඇති බැවින් ඔවුන් නිරෝගීව තබා ගැනීමත්, දෙවන කරුණ ලෙස රාජ්‍ය සේවකයින් අතරින් වැඩිම බෝනොවන රෝගවලට ලක්වීමේ ප්‍රතිශතයක් එනම් සියයට 30 ක් පමණ පොලිස් දෙපාර්තමේන්තුව තුළින් පෙන්නුම් කිරිමත්, සේවයේ නිරත වන අතරතුර දී බොනෝවන රෝග හේතුවෙන් ජීවිත අහිමි වන වැඩි පිරිසක් ද පොලිස් සේවාවේ වන බැවින් බව එය ද හේතු වු අමාත්‍යවරයා විසින් අවධාරණය කෙරිණි.
