ඉන්දුනීසියාවේ සිටි ශ්‍රී ලාංකික පාතාල නායකයින් ඇතුළු කණ්ඩායමක් අත්අඩංගුවට ගෙන මෙරටට රැගෙන ඒමේ තීරණාත්මක කාර්යභාරයක් ඉටුකළ බස්නාහිර උතුර අපරාධ කොට්ඨාසයේ සහකාර පොලිස් අධිකාරී රොහාන් ඕළුගල සහ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරී මහින්ද ජයසුන්දර යන නිලධාරීන්ට ජනාධිපති අනුර කුමාර දිසානායක උපහාර පිරිනැමීය.

ඔවුන් ඉන්දුනීසියාවේදී සිදුකළ මෙහෙයුමේදී අත්අඩංගුවට ගත් පිරිස අතර මන්දිනු පද්මසිරි නොහොත් කෙහෙල්බද්දර පද්මේ, කමාන්ඩෝ සලින්ත සහ ජකර්තා හි සැඟවී සිටි කුඩු නිලන්ත නමැත්තා ද සිටියි.

පොලිස්පති ප්‍රියන්ත වීරසූරිය සහ ජ්‍යෙෂ්ඨ නියෝජ්‍ය පොලිස්පති අසංක කරවිටගේ අධීක්ෂණය යටතේ දියත් කළ රහසිගත මෙහෙයුමකින් අනතුරුව එම අපරාධ කල්ලි නායකයින් අත්අඩංගුවට ගෙන තිබිණි.

ඉන්දුනීසියානු පොලිසිය සමඟ සම්බන්ධීකරණයෙන් කටයුතු කළ ශ්‍රී ලාංකික නිලධාරීන් දෙදෙනා අභියෝගාත්මක තත්වයන් යටතේ දින ගණනාවක් දැඩි සෝදිසි කිරීම් සිදුකර ඇති අතර, බොහෝවිට අවම ආහාර වේලක් පමණක් ලබාගනිමින් සහ ඔවුන් හඳුනාගැනීමට නොහැකි වන සේ මාර්ගවල සහ පොදු ස්ථානවල නිදාගෙන තිබිණි.

සැකකරුවන් අවසන් මොහොතේ ඔවුන් සැඟව සිටි ස්ථානයෙන් පළායෑමට උත්සාහ කළද, අවසානයේදී ඔවුන් අල්ලාගෙන මෙරටට රැගෙන ඒමට සමත්විය.

සංවිධානාත්මක අපරාධවලට එරෙහි සටනේ සුවිශේෂී සාර්ථකත්වයක් ලෙස මෙම මෙහෙයුම විස්තර කළ ජනාධිපතිවරයා එහිදී නිලධාරීන්ගේ කැපවීම අගය කළේය.