අන්තර්ජාතික ක්‍රිකට් කවුන්සිලයේ (ICC) මාර්ගෝපදේශ උල්ලංඝනය කරමින් ශ්‍රී ලංකා ක්‍රිකට් ආයතනයේ නිලවරණය පවත්වා නොමැති වීම හේතුවෙන් 2027 ආරම්භක කාන්තා චැම්පියන්ස් කුසලාන (Women’s Champions Trophy) ක්‍රිකට් තරගාවලියේ සත්කාරකත්වය ශ්‍රී ලංකාවට අහිමි වී තිබේ. ICC පාලක මණ්ඩලය විසින් මෙම තරගාවලියේ නව සත්කාරක රට ලෙස ඉන්දියාව තෝරාගෙන ඇති බව නිල වශයෙන් තහවුරු කර ඇත.

2027 පෙබරවාරි 14 සිට 28 දක්වා පැවැත්වෙන මෙම තරගාවලිය මුම්බායි සහ වඩෝදරා හිදී පැවැත්වීමට නියමිතය. ශ්‍රී ලංකා ක්‍රිකට් පරිපාලනය වෙනුවෙන් දැනට පත්කර ඇති ‘පරිවර්තන කමිටුව’ හරහා සත්කාරකත්වය රැකගැනීමට උත්සාහ කළද, ICC ව්‍යවස්ථාවට අනුකූලව ප්‍රජාතන්ත්‍රවාදී නිලවරණයක් පවත්වා නොතිබීම මෙයට ප්‍රධාන හේතුව වී ඇත. මෙම අවස්ථාව අහිමි වීම නිසා ශ්‍රී ලංකාවට ඇමෙරිකානු ඩොලර් මිලියන 20කට ආසන්න (රුපියල් බිලියන ගණනක) දැවැන්ත ආර්ථික සහ සංචාරක ප්‍රතිලාභයක් අහිමි වී යන බව වාර්තා වේ.

කෙසේවෙතත්, තරගාවලියේ සත්කාරකත්වය අහිමි වුවද ශ්‍රී ලංකා කාන්තා ක්‍රිකට් කණ්ඩායමට මෙහි තරග කිරීමේ අවස්ථාව අහිමි නොවන අතර, ඕස්ට්‍රේලියාව, එංගලන්තය, ඉන්දියාව, නවසීලන්තය සහ දකුණු අප්‍රිකාව යන රටවල් සමඟ ශ්‍රී ලංකාව ද තරගාවලියට එක්වෙයි.

අතුරු කමිටු හේතුවෙන් ශ්‍රී ලංකාවට ප්‍රධාන අන්තර්ජාතික ක්‍රිකට් තරගාවලියක සත්කාරකත්වය අහිමි වූ දෙවැනි අවස්ථාව මෙයයි. මීට පෙර 2024 වසරේ පැවැත්වීමට තිබූ වයස අවුරුදු 19න් පහළ පිරිමි ලෝක කුසලාන තරගාවලියේ සත්කාරකත්වය ද ශ්‍රී ලංකාවෙන් ඉවත් කර දකුණු අප්‍රිකාව වෙත ලබාදීමට ICCය කටයුතු කළේය.