2020 සැප්තැම්බර් මාසයේදී සිදුවූ එම්ටී නිව් ඩයමන්ඩ් (MT New Diamond) නෞකාවේ අනතුර සම්බන්ධයෙන් ශ්‍රී ලංකාවට වන්දි ලබා ගැනීමට නොහැකි වී ඇත්තේ නීතිපතිවරයාගේ නියෝගයට එරෙහිව යාත්‍රාව මුදා හැරීම හේතුවෙන් බව අධිකරණ ඇමැති විජේදාස රාජපක්ෂ අද(27) පාර්ලිමේන්තුවේදී ප්‍රකාශ කළේය.

2020 සැප්තැම්බර් 3 වන දින, ඉතා විශාල බොරතෙල් ප්‍රවාහන නෞකාවක් වන MT New Diamond ශ්‍රී ලංකාවේ බටහිර වෙරළට ඔබ්බෙන් ගිනි ගැනීමකට ලක් විය. සතියකට ආසන්න කාලයක් කඩින් කඩ ඇවිලීමෙන් පසු සැප්තැම්බර් 11 වන විට ගින්න නිවා දැමීමට හැකි වූ අතර පසුව යාත්‍රාව මුදා හැර තිබේ.

මේ සම්බන්ධයෙන් අදහස් දක්වමින් අධිකරණ ඇමැති විජේදාස රාජපක්ෂ ප්‍රකාශ කළේ අදාළ වන්දි මුදල ලැබෙන තුරු නෞකාව ශ්‍රී ලංකා මුහුදු සීමාවෙන් මුදා නොහරින ලෙස නීතිපතිවරයා එම අවස්ථාවේදී උපදෙස් ලබාදුන් බවයි. නීතිපතිවරයාගේ නියෝග නොතකමින්, එවකට විදේශ ලේකම් ජයනාත් කොළඹගේ විසින් යාත්‍රාව මුදාහරින ලෙස නාවික හමුදාවට උපදෙස් ලබාදී ඇති බව අනාවරණය වී ඇති බවද ඔහු සඳහන් කළේය.

“මෙම පියවර නිසා ශ්‍රී ලංකාවට නැව් අනතුරට අදාළව අවශ්‍ය වන්දි මුදල් ලබා ගැනීමට නොහැකි වී තිබෙනවා. අපි වෙන වෙනම නඩු තුනක් ගොනු කර ඇතත් අපට කිසිදු වන්දියක් ලබා ගැනීමට නොහැකි වී තිබෙනවා. යාත්‍රාව අයිති විදේශීය සමාගමේ නීතීඥයන් අපේ ප්‍රකාශවලටවත් ප්‍රතිචාරයක් දක්වා නැහැ,” යැයි ඔහු පාර්ලිමේන්තුවට පැවසීය.