යාපනය සහ කිලිනොච්චිය යන දිස්ත්‍රික්කවල අලුතින් මත්පැන් අලෙවිසැල් ආරම්භ කිරීමට එරෙහිව සිය තදබල විරෝධය පළ කරන ඉලංගෙයි තමිල් අරසු පක්ෂයේ පාර්ලිමේන්තු කණ්ඩායම් නායක, පාර්ලිමේන්තු මන්ත්‍රී ශානක්‍යන් රාසමාණික්කම්, උතුරු පළාතේ සංවර්ධනයට සහ ජනතා සුබසාධනයට ප්‍රමුඛතාව ලබා දෙන ලෙස රජයෙන් ඉල්ලා සිටියි.

අද පාර්ලිමේන්තුවේදී ස්ථාවර නියෝග 27(2) යටතේ ප්‍රශ්නයක් යොමු කරමින් මන්ත්‍රීවරයා කියා සිටියේ, අදාළ දිස්ත්‍රික්ක දෙකෙහි අලුතින් මත්පැන් අලෙවිසැල් විවෘත කිරීමට යෝජනා වී තිබීම සම්බන්ධයෙන් මහජනතාවගේ දැඩි විරෝධයක් පවතින බවයි.

එමෙන්ම මෙම මත්පැන් අලෙවිසැල් පාසල්, කෝවිල් සහ නේවාසික ප්‍රදේශ ආසන්නයේ පිහිටුවීමට යෝජනා වී තිබීම පිළිබඳව ද ඔහු සිය කනස්සල්ල පළ කළේය.

උතුරු පළාතේ සංවර්ධනය යනු මත්පැන් අලෙවිසැල් සංඛ්‍යාව ඉහළ නැංවීම නොව, ජනතාවගේ ජීවනෝපාය, පොදු සේවා සහ ආර්ථික අවස්ථා නැංවීම විය යුතු බව ඔහු අවධාරණය කළේය.

හිටපු ජනාධිපති රනිල් වික්‍රමසිංහගේ පාලන සමයේදී ලබා දුන් බව කියන මත්පැන් බලපත්‍ර 361 සම්බන්ධයෙන් ද මන්ත්‍රී රාසමාණික්කම් රජයෙන් ප්‍රශ්න කළේය. ඒ අනුව අදාළ බලපත්‍ර ලබා දීමට නිර්දේශ කළ දේශපාලනඥයන්ගේ නම්, ප්‍රතිලාභීන්ගේ තොරතුරු, අක්‍රමිකතා පිළිබඳ පරීක්ෂණවල සොයාගැනීම් සහ පසුව අහෝසි කරන ලද බලපත්‍ර සංඛ්‍යාව පිළිබඳ තොරතුරු ප්‍රසිද්ධියට පත් කරන ලෙස ඔහු ඉල්ලා සිටියේය.

විශේෂයෙන්ම මඩකලපුව ප්‍රදේශයේ නීති විරෝධී මත්පැන් නිෂ්පාදනය සහ අලෙවිය සීඝ්‍රයෙන් ඉහළ යාම පිළිබඳව ද අදහස් දැක්වූ මන්ත්‍රීවරයා, නැවත නැවතත් වැරදි කරන තැනැත්තන්ට එරෙහිව තදබල නීතිමය පියවර ගන්නා ලෙසත්, දැඩි දඬුවම් පනවන ලෙසත් ඉල්ලා සිටියේය. නීත්‍යානුකූල මත්පැන් මත අධික බදු අය කිරීම හේතුවෙන් පාරිභෝගිකයන් ලාභදායී නීති විරෝධී මත්පැන් වෙත යොමු වන අතර, එමඟින් මත්පැන් සම්බන්ධ සෞඛ්‍ය අවදානම් ඉහළ ගොස් නොමිලේ ලබා දෙන මහජන සෞඛ්‍ය පද්ධතියට විශාල බරක් පැටවෙන්නේදැයි ඔහු ප්‍රශ්න කළේය.

2025 සහ 2026 වසර සඳහා නීති විරෝධී මත්පැන් වැරදි සහ නැවත නැවත වැරදි කළ පුද්ගලයන් පිළිබඳ දිස්ත්‍රික් මට්ටමේ සංඛ්‍යාලේඛන මෙන්ම 2024 සැප්තැම්බර් මාසයේ සිට යාපනය සහ කිලිනොච්චිය යන ප්‍රදේශවල යෝජිත, අනුමත කරන ලද හෝ නිකුත් කරන ලද මත්පැන් බලපත්‍ර පිළිබඳ තොරතුරු ද ලබා දෙන ලෙස මන්ත්‍රී රාසමාණික්කම් ඉල්ලා සිටියේය.

මත්පැන් බලපත්‍ර නිකුත් කිරීමේදී විනිවිදභාවය තහවුරු කරන ලෙසත්, මහජන විරෝධතාවලට සවන් දෙන ලෙසත්, නීති විරෝධී මත්පැන් නිෂ්පාදනය සහ අලෙවිය මර්දනය කිරීමට පියවර ශක්තිමත් කරන ලෙසත් ඔහු රජයෙන් ඉල්ලා සිටියේය.

පාර්ලිමේන්තු මන්ත්‍රී ශානක්‍යන් මහතා නැගූ ප්‍රශ්නවලට පිළිතුරු දෙමින් ආර්ථික සංවර්ධන නියෝජ්‍ය අමාත්‍ය නිශාන්ත ජයවීර කියා සිටියේ, වැරදිකරුවන්ට පනවන දඬුවම් වැඩි කිරීම සඳහා සුරාබදු ආඥාපනත සංශෝධනය කිරීමට අදාළ කෙටුම්පත් දැනටමත් සකස් කර ඇති අතර ඊට අදාළ නීතිමය ක්‍රියාමාර්ග ආරම්භ කර ඇති බවයි.

පවතින සුරාබදු ආඥාපනත මේ වන විට සංශෝධනය කර ඇති අතර, ඉදිරියේදී නීතිමය සංශෝධන ඊට ඇතුළත් කරන බව නියෝජ්‍ය අමාත්‍ය නිශාන්ත ජයවීර වැඩිදුරටත් පැවසීය.

පවතින ආඥාපනතේ අඩුපාඩු හඳුනාගෙන ඒවා නිවැරදි කර ඇති බවත්, නුදුරේදීම ඊට අනුමැතිය හිමිවනු ඇතැයි අපේක්ෂා කරන බවත් නියෝජ්‍ය අමාත්‍යවරයා වැඩිදුරටත් සඳහන් කළේය.