August 29, 2025
විදේශයන්හි සැඟවී සිටින සංවිධානාත්මක සහ පාතාල අපරාධකරුවන් 75 දෙනෙකුට පමණ රතු වරෙන්තු නිකුත් කර ඇති බව මහජන ආරක්ෂක අමාත්‍ය ආනන්ද විජේපාල පවසයි.
ජනමාධ්‍ය අමතමින් ඔහු හෙළිකළේ, ඉන් සැළකිව යුතු සංඛ්‍යාවක්, එනම් ඔවුන්ගෙන් 20 දෙනෙකු පමණ දැනටමත් මෙරටට ගෙනැවිත් ඇති බවයි.
ඉතිරි සැකකරුවන් ද නුදුරු අනාගතයේ දී කඩිනමින් එම රටවලින් පිටුවහල් කර නීතිය හමුවට ඉදිරිපත් කරන බව අමාත්‍ය විජේපාල තවදුරටත් පැවසීය.
ඉන්දුනීසියාවේ සිදුකළ වැටළීම් වලදී අත්අඩංගුවට ගත් පාතාල සාමාජිකයන් හයදෙනා ඉදිරි දින කිහිපය තුළ ශ්‍රී ලංකාවට ගෙන එන බව මහජන ආරක්ෂක අමාත්‍යවරයා තවදුරටත් සඳහන් කළේය.
“ඔවුන් ඉදිරි දින 02 හෝ 03 තුළ ආපසු ගෙන එනවා. ඒ කණ්ඩායම නැවත මෙරටට ගෙන්වා ගැනීම සඳහා ඉන්දුනීසියානු බලධාරීන් සමඟ සාකච්ඡා පැවැත්වෙමින් පවතිනවා. ඔවුන් නැවත ශ්‍රී ලංකාවට ගෙන ආ පසු ඔවුන්ට එරෙහිව නීතිමය පියවර ගනු ලබනවා” ඔහු පැවසීය.
දේශපාලනඥයෙකු, පාතාල චරිතයක් හෝ පොලිස් නිලධාරියෙක් වේවා, වැරදි ක්‍රියාමාර්ගවලට සම්බන්ධ ඕනෑම අයට එරෙහිව රජය නීතිය ක්‍රියාත්මක කරන බව අමාත්‍ය ආනන්ද විජේපාල එහිදී අවධාරණය කළේය.
