පොලිසිය, විශේෂ කාර්ය බළකාය සහ ත්‍රිවිධ හමුදාව එක්ව මත්ද්‍රව්‍ය ජාවාරම් සහ අපරාධ ජාල මැඩපැවැත්වීම වෙනුවෙන් දිවයින පුරා සතියක කාලයක් මෙහෙයුමක් දියත් කර තිබේ.

ජූලි 18 සහ 24 අතර කාලය තුළ සිදු කෙරුණු මෙම මෙහෙයුමේ ප්‍රතිඵලයක් ලෙස සැකකරුවන් 1,455 දෙනෙකු අත්අඩංගුවට ගැනීමට සහ අයිස් මත්ද්‍රව්‍ය, හෙරොයින් සහ කංසා විශාල ප්‍රමාණයක් අත්අඩංගුවට ගැනීමට හැකි වී ඇත.

මහජන ආරක්ෂක හා පාර්ලිමේන්තු කටයුතු අමාත්‍යාංශය විසින් නිකුත් කරන ලද මාධ්‍ය නිවේදනයකට අනුව, අත්අඩංගුවට ගැනීම්වලදී අයිස් මත්ද්‍රව්‍ය ග්‍රෑම් 374 සහ මිලිග්‍රෑම් 336, හෙරොයින් ග්‍රෑම් 218 සහ මිලිග්‍රෑම් 281 ඇතුළුව නීති විරෝධී මත්ද්‍රව්‍ය සැළකිව ප්‍රමාණයක් අත්අඩංගුවට ගැනීමට හැකි වී තිබේ.

සිකුරාදා (25) දින පමණක් ඉලක්කගත වැටලීම් සඳහා 6,500කට අධික පිරිසක් යොදවා තිබු බව පැවසේ.

ඒ අනුව පුද්ගලයන් 24,281ක්, වාහන 10,175ක් සහ යතුරුපැදි 7,240ක් පරීක්ෂා කරන ලදී.

සතියක් පුරා සිදු කරන ලද වැටලීම්වලින් අයිස් මත්ද්‍රව්‍ය කිලෝග්‍රෑම් 2.1කට වැඩි ප්‍රමාණයක්, හෙරොයින් කිලෝග්‍රෑම් 1.3ක් පමණ සහ ගංජා කිලෝග්‍රෑම් 82කට වැඩි ප්‍රමාණයක් අත්අඩංගුවට ගැනීමට හැකි වූ බව නිලධාරීන් විසින් වාර්තා කර ඇත.

මත්ද්‍රව්‍ය වැරදි වලට අමතරව, විශේෂ වැටලීම්වලදී වෙනත් අපරාධ ක්‍රියාකාරකම්වලට සම්බන්ධ පුද්ගලයන් 17 දෙනෙකු අත්අඩංගුවට ගත් අතර, වරෙන්තු තිබු පුද්ගලයන් 408 දෙනෙකු ද අත්අඩංගුවට ගෙන තිබේ.