ඉන්දියානු සාගර කලාපයේ සමුද්‍රීය ආරක්ෂාව සහ සන්නිවේදන සබඳතා ශක්තිමත් කිරීම අරමුණු කරගනිමින්, ඇමෙරිකානු ඩොලර් මිලියන 4ක් (ශ්‍රී ලංකා රුපියල් බිලියන 1.2කට අධික) වටිනා ‘ෆ්ලීට් බ්‍රෝඩ්බෑන්ඩ්’ (Fleet Broadband) චන්ද්‍රිකා සන්නිවේදන පද්ධතියක් ශ්‍රී ලංකා නාවික හමුදාවට ලබාදීමට පියවර ගත් බව ඇමෙරිකා එක්සත් ජනපදය ප්‍රකාශ කරයි.

දකුණු සහ මධ්‍යම ආසියානු කටයුතු පිළිබඳ ඇමෙරිකානු සහකාර රාජ්‍ය ලේකම් පෝල් කපූර් කොළඹ වරායේ නැංගුරම් ලා ඇති ‘ශ්‍රී ලංකා නාවික නෞකා ගජබාහු’ පරිශ්‍රයේදී සිදුකළ නිල සංචාරයකදී මෙම නිවේදනය නිකුත් කරන ලදී. එහිදී ආරක්ෂක රාජ්‍ය අමාත්‍ය විශ්‍රාමික මේජර් ජෙනරාල් අරුණ ජයසේකර සහ ශ්‍රී ලංකා නාවික හමුදාධිපති වයිස් අද්මිරාල් කාංචන බනගොඩ විසින් ඇමෙරිකානු රාජ්‍යතාන්ත්‍රික නිලධාරියාව පිළිගනු ලැබූහ.

මෙම සංචාරය අතරතුර, සමුද්‍රීය සහයෝගීතාව පුළුල් කිරීම, අන්තර්ජාතික නැව් මාර්ග ආරක්ෂා කිරීම, කලාපීය ආපදා සහන සේවා සැපයීම සහ ඉන්දියන් සාගරය හරහා සිදුවන නීතිවිරෝධී ජාවාරම් මැඩපැවැත්වීම සඳහා එක්සත් ජනපදයේ දියුණු චන්ද්‍රිකා සන්නිවේදන තාක්ෂණය භාවිත කළ හැකි ආකාරය පිළිබඳව දෙපාර්ශවය අතර විශේෂ සාකච්ඡාවක් ද පැවැත්විණි.

‘කොබ්හැම්’ සහ ‘ඉන්මාර්සැට්’ සමාගම් විසින් නිෂ්පාදිත මෙම ෆ්ලීට් බ්‍රෝඩ්බෑන්ඩ් සන්නිවේදන පද්ධතිය ශ්‍රී ලංකා නාවික හමුදාවේ ගැඹුරු මුහුදේ නිරීක්ෂණ කටයුතුවල නිරත වන නෞකා (Offshore Patrol Vessels) වෙත සවිකිරීමට නියමිතය. මෙම තාක්ෂණය මඟින් නෞකා අතර මෙන්ම නෞකා සහ ගොඩබිම පිහිටි මූලස්ථාන අතර ආරක්ෂිත හඬ, දත්ත සහ තොරතුරු හුවමාරු කර ගැනීමේ හැකියාව ලැබෙන අතර, වෙරළ තීරයෙන් ඔබ්බට ඉතා ඈත මුහුදේ ක්‍රියාන්විතවල යෙදෙන විට ද අඛණ්ඩ සන්නිවේදනයක් පවත්වාගත හැක.

ඇමෙරිකානු බලධාරීන්ට අනුව, මෙම නව පද්ධතිය මඟින් ශ්‍රී ලංකා නාවික හමුදාවට සිය ප්‍රධාන මූලස්ථාන, ගුවන් යානා සහ සෙසු නෞකා සමඟ සජීවීව (Real-time) සන්නිවේදනය පවත්වා ගැනීමට අවස්ථාව සැලසේ. එමඟින් සමුද්‍රීය කලාපීය නිරීක්ෂණ කටයුතු ශක්තිමත් වන අතර, මෙහෙයුම් සම්බන්ධීකරණය, හදිසි ආපදා ප්‍රතිචාර දැක්වීම් මෙන්ම නීතිවිරෝධී ජාවාරම්වලට සම්බන්ධ යාත්‍රා වැටලීම සහ ජාත්‍යන්තර වෙළඳ නැව් මාර්ග ආරක්ෂා කිරීමේ කටයුතු වඩාත් කාර්යක්ෂම වනු ඇත.

මෙහිදී අදහස් දැක්වූ ඇමෙරිකානු සහකාර රාජ්‍ය ලේකම් පෝල් කපූර් ප්‍රකාශ කළේ, මෙම තාක්ෂණය ශ්‍රී ලංකා නාවික හමුදාවේ සන්නිවේදන ක්ෂේත්‍රයේ දැවැන්ත නවීකරණයක් වනු ඇති බවයි. මේ ඔස්සේ ශ්‍රී ලංකාවට හදිසි අවස්ථාවන්හිදී වඩාත් කඩිනමින් ක්‍රියාත්මක වීමටත්, වාණිජ නැව් මාර්ග සුරැකීමටත්, ඉන්දියන් සාගරයේ සිදුවන නීතිවිරෝධී ක්‍රියාකාරකම් මැඩපැවැත්වීමටත් ඉහළ දායකත්වයක් ලැබෙනු ඇතැයි ද ඔහු විශ්වාසය පළ කළේය.

සමාරම්භක අවස්ථාවට එක්වූ ආරක්ෂක රාජ්‍ය අමාත්‍ය අරුණ ජයසේකර කියාසිටියේ, මෙම ෆ්ලීට් බ්‍රෝඩ්බෑන්ඩ් පද්ධතිය හඳුන්වාදීමෙන් ශ්‍රී ලංකාවේ සමුද්‍රීය නිරීක්ෂණ ධාරිතාව සැලකිය යුතු ලෙස ඉහළ යන අතර ශ්‍රී ලංකාව සහ ඇමෙරිකාව අතර ආරක්ෂක සහයෝගීතාව තවදුරටත් ශක්තිමත් වන බවයි. මෙම තාක්ෂණය මඟින් සමස්ත නාවික බලඇණියේ සන්නිවේදන සබඳතා දියුණු වන බවත්, සජීවී තත්ත්වයන් නිරීක්ෂණය කිරීමට හැකි වන බවත්, කලාපීය හවුල්කරුවන් සමඟ තොරතුරු හුවමාරු කර ගනිමින් ජාත්‍යන්තර නැව් මාර්ගවල ආරක්ෂාව සහ විශ්වාසනීයත්වය තහවුරු කිරීමට මින් ඉමහත් පිටුවහලක් ලැබෙන බවත් අමාත්‍යවරයා වැඩිදුරටත් සඳහන් කළේය.