ශ්‍රී ලංකා ගුවන් හමුදාවෙන් ලැබුණු බුද්ධි තොරතුරක් මත සිදුකළ වැටලීමකදී, විකිණීම සඳහා ආරක්ෂිත වනජීවී කොටස් ළඟ තබාගෙන සිටි බව කියන 45 හැවිරිදි කාන්තාවක් ගම්පහ, කලගෙඩිහේන ප්‍රදේශයේදී අත්අඩංගුවට ගත් බව වනජීවී සංරක්ෂණ දෙපාර්තමේන්තුව පවසයි.

මෙම වැටලීමේදී වනජීවී නිලධාරීන් විසින් ආරක්ෂිත ශ්‍රී ලංකා හක්බෙලි කටු 5ක්, ගෝන අං තට්ටු 5ක්, තිත් මුව අං තට්ටු 8ක්, ඇතෙකුගේ දළ කොටසක් සහ හඳුනානොගත් වෙනත් බෙලි කටු 23ක් ඇතුළු නීතිවිරෝධීව ළඟ තබාගත් සත්ව කොටස් තොගයක් සොයාගෙන ඇත.

මෙම භාණ්ඩ පුරාවස්තු එකතු කරන ස්ථානයක් ලෙස පැවසෙන පරිශ්‍රයක තිබී සොයාගෙන තිබේ.

සැකකාරිය පසුව හොරගොල්ල වනජීවී කාර්යාලය වෙත ඉදිරිපත් කිරීමෙන් අනතුරුව රුපියල් මිලියනයක පුද්ගල ඇප මත මුදාහැර ඇත.

ඇය සහ අත්අඩංගුවට ගත් භාණ්ඩ ජූලි මස 10 වැනිදා ගම්පහ මහේස්ත්‍රාත් අධිකරණයට ඉදිරිපත් කිරීමට නියමිතය.

වනජීවී කාර්යාල කිහිපයක නිලධාරීන් සහ පොලිස් විශේෂ කාර්ය බළකාය (STF) ඒකාබද්ධව මෙම වැටලීම සිදුකර තිබේ.