July 13, 2026
සිවිල් ආරක්ෂක දෙපාර්තමේන්තුවේ නිලධාරීන් වනජීවී දෙපාර්තමේන්තුවට අනුයුක්ත කිරීමට රජය ගෙන ඇති පියවරට විරෝධය පළකරමින්, වනජීවී සංරක්ෂණ දෙපාර්තමේන්තුවේ සියලුම වෘත්තීය සමිති සාමාජිකයන් අද (13) ලෙඩ නිවාඩු වාර්තා කර වෘත්තීය සමිති ක්රියාමාර්ගයක් ආරම්භ කර තිබේ.
මෙම විරෝධතාවයේ ප්රතිඵලයක් ලෙස බත්තරමුල්ලේ පිහිටි වනජීවී දෙපාර්තමේන්තු මූලස්ථානය ඉදිරිපිට දැවැන්ත උද්ඝෝෂණයක් ද පැවැත්වීමට නියමිතය.
ජනමාධ්ය වෙත අදහස් දක්වමින් සමස්ත ලංකා වනජීවී නිලධාරීන්ගේ සංගමයේ සභාපති ඉන්දික පීරිස් චෝදනා කළේ වනජීවී දෙපාර්තමේන්තුවේ අධ්යක්ෂ ජනරාල්වරයා ඒකාධිකාරී ලෙස කටයුතු කරමින් දැනට සිටින නිලධාරීන්ට අසාධාරණයක් වන අයුරින් මෙම බඳවා ගැනීම් සිදුකිරීමට උත්සාහ කරන බවයි.
“අපි බඳවාගැනීම්වලට විරුද්ධ නැහැ, නමුත් මේ ක්රියාවලිය දෝෂ සහිතයි. අපි මේ ගැන සාකච්ඡා ඉල්ලා සිටියත් අධ්යක්ෂ ජනරාල්වරයා අපව මඟහරිමින් වැරදි මාර්ගයක ඉදිරියට යනවා. මෙයින් ක්ෂේත්ර සහකාරවරුන්ට සහ ද්විතීයික මට්ටමේ නිලධාරීන්ට පමණක් නොව, දෙපාර්තමේන්තුව පුරා සිටින අඩවි ආරක්ෂකයන්ට, අඩවි සහකාරවරුන්ට සහ නියාමකවරුන්ට ද හානියක් සිදුවෙනවා” යැයි ඔහු පැවසීය.
ජූලි 13 වැනිදාට පෙර සාකච්ඡා ලබාදෙන ලෙස දිගින් දිගටම ඉල්ලා සිටියද, කිසිදු සාකච්ඡාවක් ලබා නොදීම හේතුවෙන් නිලධාරීන්ට මෙලෙස ලෙඩ නිවාඩු දමා විරෝධතා ක්රියාමාර්ගවලට එළඹීමට සිදුවූ බව ද ඔහු වැඩිදුරටත් සඳහන් කළේය.
මේ අතර, මෙම චෝදනාවලට ප්රතිචාර දක්වමින් වනජීවී අධ්යක්ෂ ජනරාල් රන්ජන් මාරසිංහ ප්රකාශ කර ඇත්තේ සේවක ගැටලු සම්බන්ධයෙන් දැනටමත් සාකච්ඡා පවත්වා ඇති බවයි.
සිවිල් ආරක්ෂක දෙපාර්තමේන්තු නිලධාරීන් අනුයුක්ත කිරීම සම්බන්ධයෙන් තීරණය කිරීම සඳහා පරිසර අමාත්යාංශය විසින් කමිටුවක් පත්කර ඇති බවත්, ඉදිරි පියවර එහි නිර්දේශ මත තීරණය කරන බවත් ඔහු වැඩිදුරටත් සඳහන් කළේය.
