May 21, 2025
සේවකයන්ගේ බැනවැදීමෙන් හමුවේ ශ්‍රී ලංකා රූපවාහිනී සංස්ථාවේ අධ්‍යක්ෂ ජනරාල් මනෝජ් නදීෂණ අමරසිංහ සහ නියෝජ්‍ය අධ්‍යක්ෂ ජනරාල් (පරිපාලන) තනුජා ආරියරත්න යන අය අද (21) දින කාර්යාල පරිශ්‍රයෙන් පිටව ගොස් ඇත.
රූපවාහිනී සංස්ථාවේ අභ්‍යන්තර ආරංචි මාර්ගවලට අනුව, අදාළ නිලධාරීන් ආයතනයේ සේවකන් සමඟ ඇතිකර ගත් ගැටුම්වල ප්‍රතිඵලයක් වශයෙන් මෙලෙස කාර්යාල පරිශ්‍රයෙන් පිටව ගොස් තිබේ.
තනුජා ආරියරත්න විසින් නිතර සේවකයින්ට බැනවැදීම සහ ඔවුන්ව පහත් කොට සැලකීම ඇතුළු කරුණු ගණනාවක් සම්බන්ධයෙන් රූපවාහිනී සංස්ථාවේ සේවකයන් සමඟ මෙලෙස බහින්බස් වී ඇති බව වාර්තා වේ.
රූපවාහිනී ආයතනයේ අධ්‍යක්ෂ ජනරාල්වරයා ඇයව දිගින් දිගටම ආරක්ෂා කළ බැවින්, සේවකයන් ඔහු සමඟ කෝපයට පත් වී ඇති අතර, මෙම තත්වය සම්බන්ධයෙන් සේවකයන් අධ්‍යක්ෂ ජනරාල් මනෝජ් නදීෂණ සමඟ සාකච්ඡාවක් ඉල්ලා සිටීමෙන් පසු අද දින ආරවුලක් ඇතිව තිබේ.
ගැටුමින් පසු සේවකයන් එක්සත් වී ඇති අතර, ඒ නිසා අධ්‍යක්ෂ ජනරාල්වරයා සහ පරිපාලන අංශය භාර අධ්‍යක්ෂ ජනරාල්වරිය කාර්යාල පරිශ්‍රයෙන් ඉවත් කිරීමට සිදුව ඇත.
ඇයව පත්කර ඇත්තේ, පෙර සභාපති සෙනේෂ් බණ්ඩාර දිසානායකගේ පාලන සමයේදීය.
