කේරළයේ වෙසෙන දහස් සංඛ්‍යාත තරුණ හෙද-හෙදියන්ගේ එකම සහ ප්‍රධානතම සිහිනය වී ඇත්තේ ඇමරිකා එක්සත් ජනපදයේ රැකියාවක නිරත වීමයි.

මේ සඳහා විභාගවලට පෙනී සිටීමට, ලේඛන කටයුතු සම්පූර්ණ කිරීමට සහ දිගු කාලයක් බලා සිටීමට සිදු වුවද, ඉහළ වැටුප්, වෘත්තීය දියුණුව සහ ජාත්‍යන්තර අත්දැකීම් ලබා ගැනීමේ අරමුණින් ඔවුහු තවමත් ඇමරිකාව දෙස බලා සිටිති.

මෙම ඉල්ලීම තවදුරටත් ඉහළ යාමට ප්‍රධානතම හේතුව වී ඇත්තේ ඇමරිකානු සෞඛ්‍ය පද්ධතිය තුළ පවතින දැඩි කාර්ය මණ්ඩල හිඟයයි.

ඇමරිකානු කම්කරු සංඛ්‍යාලේඛන කාර්යාංශය ඇස්තමේන්තු කරන පරිදි, එරට ජනගහනය වයස්ගත වීම සහ වෘත්තිකයන් විශ්‍රාම යෑම හේතුවෙන් 2024 සහ 2034 වසර දහය අතර කාලය තුළ වසරකට ලියාපදිංචි හෙද පුරප්පාඩු 189,100ක් පමණ ඇති වීමට නියමිතය.

මේ නිසා ඇමරිකානු රෝහල් ජාත්‍යන්තර මට්ටමින් සේවකයන් බඳවා ගැනීමට කටයුතු කරන අතර, එහිදී පුහුණු සෞඛ්‍ය වෘත්තිකයන් සපයන ප්‍රධානතම ප්‍රභවයක් බවට ඉන්දියාව පත්ව ඇත.

කෙසේ වෙතත්, රැකියා පදනම් කරගත් සංක්‍රමණ වීසා ලබා ගැනීමේදී ඉන්දීය අයදුම්කරුවන්ට දීර්ඝතම බලා සිටීමේ කාලයකට මුහුණ දීමට සිදුව තිබේ. මේ හේතුවෙන් අද දින මෙම ක්‍රියාවලිය ආරම්භ කරන හෙදියකට ඇමරිකානු සංක්‍රමණික වීසා බලපත්‍රයක් ලබා ගැනීම සඳහා වසර දහයකට වඩා වැඩි කාලයක් පෝලිමේ බලා සිටීමට සිදු විය හැකිය.

එවැනි දීර්ඝ බලා සිටීමේ කාලයක් තිබුණද, කේරළයේ බඳවා ගැනීමේ නියෝජිත ආයතන අඛණ්ඩව අයදුම්පත් භාර ගනිමින් සිටියි. සෞඛ්‍ය වෘත්තිකයන්ට විදේශීය බලපත්‍ර සහ භාෂා විභාග සඳහා පුහුණුව ලබා දෙන Tiju’s Academy හි මෙහෙයුම් කළමනාකරු ලුවී ටෙරන්ස් ‘ඩොයිෂ් වෙල්ලේ’ (DW) පුවත් සේවයට අදහස් දක්වමින් පවසා සිටියේ, “ඔව්, අපි තවමත් අයදුම්පත් ක්‍රියාවලිය දිගටම කරගෙන යනවා. කේරළයේ හෙදියන් හොඳින් පුහුණුව ලබා ඇති, මනාව ඉංග්‍රීසි කතා කළ හැකි සහ කැපවීමෙන් වැඩ කරන පිරිසක්. ඉහළ වැටුප්, යහපත් සේවා පරිසරය සහ දිගුකාලීන වෘත්තීය අවස්ථා නිසා බොහෝ දෙනෙක් තවමත් ඇමරිකාව තමන්ගේ සිහින ගමනාන්තය ලෙස සලකනවා” යනුවෙනි.

කාලය අපතේ යැවීමට අකමැති හෙද-හෙදියන් බොහෝ දෙනෙක් සිය වෘත්තීය ජීවිතයේ මුල් අවධියේදීම මෙම සංක්‍රමණ ක්‍රියාවලිය ආරම්භ කරති.

එහිදී බඳවා ගැනීමේ ආයතන ඔවුන්ට NCLEX විභාගය සමත් වීමට, සුදුසුකම් සනාථ කිරීමට සහ ඇමරිකානු රෝහල්වලින් රැකියා දීමනා සුරක්ෂිත කර ගැනීමට උදවු කරයි.

සංක්‍රමණික අයදුම්පතක් නිල වශයෙන් ගොනු කළ පසු ඔවුන්ට ප්‍රමුඛතා දිනයක් හිමි වන අතර, එමඟින් වීසා පෝලිමේ ඔවුන්ගේ ස්ථානය නිල වශයෙන් වෙන් කරවා ගැනීම සිදුවේ.