රජය සිය ‘ක්ලීන් ශ්‍රී ලංකා’ ජාතික වැඩසටහන යටතේ වෙරළබඩ විවේක උද්‍යාන සංවර්ධන ව්‍යාපෘතිය හඳුන්වා දුන්නේ දිස්ත්‍රික්ක 14ක වෙරළබඩ තීර 43ක් විවේක තෝතැන්නක් බවට පරිවර්තනය කිරීමට පොරොන්දු වෙමිනි.

ඒ යටතේ මංපෙත්, නැරඹුම් ස්ථාන සහ හරිත පැහැය සමඟ සංචාරක ව්‍යාපාරය සංවර්ධනය කිරීමට නියමිතව තිබූ අතර පුරවැසියන් සඳහා අත්‍යවශ්‍ය විනෝදාත්මක පහසුකම් නිර්මාණය කිරීමට ද නියමිතව තිබිණි.

එහෙත් ගාල්ලේ මහමෝදර වෙරළ තීරයේ, ආරම්භ වූ හරිත වැඩසටහන දැන් දූෂණය සහ මහජන මුදල් අනිසි ලෙස භාවිත කිරීම සම්බන්ධයෙන් රතු කොඩි ඔසවමින් සිටී.

ඉසුලා කන්ස්ට්‍රක්ෂන් නම් සමාගම ව්‍යාපෘතියට සම්බන්ධ වී සිටී.

එය එම ව්‍යාපෘතිය අධීක්ෂණය කරන දෙපාර්තමේන්තුවම වන වෙරළ සංරක්ෂණ දෙපාර්තමේන්තුවේ නිලධාරියකුට අයත් සමාගමකි.

බංකු සහ පැළ සිටුවීම වෙනුවට, මහමෝදර ව්‍යාපෘතියේ පළමු අදියර ගාල්ල-මාතර මාර්ගය දිගේ දැවැන්ත ගල් පවුරක් ඉදිකිරීම බවට පත්ව ඇති බව වාර්තා වේ.

මිලියන ගණනක් වැය වන මෙම තාප්පය අනුමත ඇස්තමේන්තුවක්, ටෙන්ඩර් ක්‍රියාවලියක් හෝ ප්‍රසම්පාදන ක්‍රියා පටිපාටියකින් තොරව ඉදිකරමින් පවතින බව ද කියැවේ.

ඊටත් වඩා ගැටලුව වන්නේ එය නීත්‍යනුකූලව අවශ්‍ය අනුමැතියකින් තොරව මාර්ග සංවර්ධන අධිකාරියේ මාර්ග වෙන් කිරීමේ කලාපයට ඇතුළු වීමයි.

“මෙම තාප්පය සඳහා මහජන මුදල් නිදහස් කළහොත්, එය දවල් කරන මංකොල්ලයක් වැනි දෙයක් වෙනවා. උතුරු හා නැගෙනහිර ප්‍රදේශවල අප දැඩි ලෙස අනුගමනය කරන ක්‍රියා පටිපාටි ගාල්ලේදී පැහැදිලිවම නොසළකා හැරලා,” වෙරළ සංරක්ෂණ දෙපාර්තමේන්තුවේ ජ්‍යෙෂ්ඨ නිලධාරියෙක් පවසා තිබේ.

ජාතික වශයෙන්, වෙරළ උද්‍යාන සඳහා රුපියල් මිලියන 95ක් වෙන් කර ඇත.

උතුරු හා නැගෙනහිර පළාත්වල, නිසි ක්‍රියා පටිපාටිය අනුගමනය කරමින්, සෑම උද්‍යානයකටම රුපියල් මිලියන 3-4ක් පමණ වැය වී ඇත.

එහෙත් ගාල්ලේදී, මහමෝදර ව්‍යාපෘතියට පමණක් රුපියල් මිලියන 16-17ක් වැය වන අතර, එය වියදම් සහ පිටුපස ගනුදෙනු පිළිබඳ සැකයන් ඇති කරයි.

පරිසරවේදීන් ද ඒ හා සමානව කණස්සල්ලට පත්ව ඇත.

“මෙම උද්‍යානවල සම්පූර්ණ අදහස වූයේ වෙරළ ආරක්ෂා කිරීම සහ හරිත අවකාශයන් නිර්මාණය කිරීමයි, ගල් බිත්ති ඉදිකිරීමේ කිසිදු පාරිසරික අර්ථයක් නැහැ. එය මහමෝදර ස්වාභාවික චමත්කාරය විනාශ කරනවා. වැඩසටහනේ මුල් දැක්මත් පාවා දෙනවා.” යනුවෙන් වෙරළබඩ පරිසර විද්‍යාඥයෙක් පැවසීය.

ප්‍රදේශවාසීන් ද සිටින්නේ බලාපොරොත්තු සුන්වය.

“මෙම උද්‍යානය පවුල් සඳහා ගස්, බංකු සහ ඇවිදීමේ ස්ථාන ගෙන එන බව අපට පැවසුවා, ඒ වෙනුවට, ඔවුන් කිසිවකු ඉල්ලා නොසිටි තාප්පයක් ඉදිකරමින් ඉන්නවා. මුදල් අපේ ප්‍රජාවට නොව යමකුගේ සාක්කුවට යන බවක් තමයි පෙන්නේ,” ගාල්ලේ පදිංචිකරුවකු වන සුනිල් මහවත්ත ආරච්චි පැවසීය.

සංචාරක ක්‍රියාකරුවන් ද මෙම හානියට බිය වී සිටී.

“මහමෝදර විශේෂ වන්නේ එය ස්පර්ශ නොවූ තැනක් නිසා, මෙම ව්‍යාපෘති අනිසි ලෙස භාවිත කළහොත්, පිරිසිදු හා හරිත ගමනාන්තයක් ලෙස ශ්‍රී ලංකාවේ ප්‍රතිරූපය කෙරෙහි සංචාරකයන්ගේ විශ්වාසය නැති වී යයි.” යනුවෙන් අසල කුඩා ආගන්තුක නිවාසයක් පවත්වාගෙන යන චමරි ද සිල්වා සඳහන් කළාය.