බරපතළ ලෙස බලය අයුතු ලෙස පරිහරණය කිරීම සම්බන්ධයෙන් වරදකරු වීම හේතුවෙන් පොලිස්පති දේශබන්දු තෙන්නකෝන් එම ධුරයෙන් ඉවත් කිරීමේ සූදානමක් පවතින පසුබිමක් ශ්‍රී ලංකා පොලිසියේ 37 වැනි පොලිස්පතිවරයා පත්කිරීම සඳහා ජනාධිපති අනුර කුමාර දිසානායක ව්‍යවස්ථා සභාවට එම තනතුර සඳහා සුදුසු අපේක්ෂකයෙකු හෝ කිහිපදෙනෙකු නම් කිරීමට නියමිතව තිබේ.

දේශබන්දු තෙන්නකෝන් පාර්ලිමේන්තුව හමුවේ දෝෂාභියෝගයට ලක්කළ පසු ඔහුගේ අනුප්‍රාප්තිකයා පත් කිරීමේ ක්‍රියාවලිය ජනාධිපතිවරයාට විධිමත් ලෙස ආරම්භ කළ හැකි බව උසස් පොලිස් නිලධාරියෙක් උපුටා දක්වමින් ඩේලි මිරර් පුවත්පත වාර්තා කරයි.

ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය 2024 සැප්තැම්බර් 27 වැනිදා සිට වැඩබලන පොලිස්පතිවරයා ලෙස කටයුතු කරමින් සිටියි.

කෙසේවෙතත්, පාස්කු ඉරිදා ප්‍රහාරය සම්බන්ධයෙන් ජාතික පොලිස් කොමිෂන් සභාව විසින් පසුගිය සතියේ සේවයෙන් ඉවත් කරන ලද ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධනගේ වැඩ තහනම් කිරීමත් සමඟ දැන් වැඩ බලන ජ්‍යෙෂ්ඨ නියෝජ්‍ය පොලිස්පති (පරිපාලන) ලෙස කටයුතු කරන ජ්‍යෙෂ්ඨ නියෝජ්‍ය පොලිස්පති ලලිත් පතිනායකට වඩා ප්‍රියන්ත වීරසූරිය ජ්‍යෙෂ්ඨත්වයට අනුව දෙවැනි ස්ථානයේ පසුවේ.

ආණ්ඩුක්‍රම ව්‍යවස්ථාවේ 21 වැනි සංශෝධනය මඟින් සලකා බැලීම සඳහා එක් නිලධාරියකු හෝ කිහිපදෙනෙකු ආණ්ඩුක්‍රම ව්‍යවස්ථා සභාවට නිර්දේශ කිරීමට ජනාධිපතිවරයාට බලය පවරා ඇත.

සාමාජිකයින් දසදෙනෙකුගෙන් සමන්විත කවුන්සිලයේ අවම වශයෙන් සාමාජිකයින් පස්දෙනෙකුගේ අනුමැතිය මත පොලිස්පතිවරයා පත්කරනු ලැබේ.

ලලිත් පතිනායක එම භූමිකාවට සුදුසුම ජ්‍යෙෂ්ඨතම නිලධාරියා ලෙස පෙනෙන්නට තිබුණ ද, ප්‍රියන්ත වීරසූරිය වැඩබලන පොලිස්පතිවරයා ලෙස දීර්ඝ කාලයක් කටයුතු කිරීම හේතුවෙන් ඔහුට පත්වීම් ක්‍රියාවලියේදී කැපීපෙනෙන වාසියක් හිමිවීමේ සම්භාවිතාවක් පවතී.

ප්‍රියන්ත වීරසූරිය අවුරුදු 60 දී විශ්‍රාම ගියත් ලලිත් පතිනායකට සිය විශ්‍රාම යාමට පෙර එම තනතුර දැරීමට කෙටි අවස්ථාවක් හිමිවිය හැක.

කෙසේවෙතත් පත්කිරීමේ අවසන් තීරණය ජනාධිපතිවරයාගේ නිර්දේශය මත රඳාපවතී.