පාස්කු ඉරිදා ත්‍රස්ත ප්‍රහාරය සම්බන්ධයෙන් විමර්ශන නැවත ආරම්භ කර ඇති පසුබිමක, ඇමෙරිකානු ෆෙඩරල් විමර්ශන කාර්යාංශය (FBI) විසින් සිදුකරන ලද විමර්ශනවලට අදාළ සාක්ෂි සහ තොරතුරු ලබාගැනීමට රජය අපොහොසත් වී ඇත්තේ මන්දැයි එක්සත් ජාතික පක්ෂය ප්‍රශ්න කරයි.

එක්සත් ජාතික පක්ෂය විසින් නිකුත් කරන ලද විශේෂ නිල නිවේදනයක් මඟින් මෙම ප්‍රශ්න කිරීම සිදුකර ඇති අතර, එම නිවේදනයේ මෙසේ සඳහන් වේ.

‘2020 නොවැම්බර් 12 වන දින, FBI ආයතනයේ විශේෂ නියෝජිත මෙරිලී ආර්. ගොඩ්වින් විසින් කැලිෆෝනියා මධ්‍යම දිස්ත්‍රික්කය සඳහා වන එක්සත් ජනපද දිස්ත්‍රික් අධිකරණයේ පිටු 71කින් යුත් දිවුරුම් ප්‍රකාශයක් ගොනුකරන ලදී. වසර දෙකක විමර්ශනයකින් අනතුරුව, 2020 දෙසැම්බර් 11 වන දින ලොස් ඇන්ජලීස් හි එක්සත් ජනපද දිස්ත්‍රික් අධිකරණයේ අපරාධ නඩුවක් පවරන ලදී. එම පැමිණිල්ලේ නම් කර ඇති විත්තිකරුවන් වන මොහොමඩ් නවුෆර්, මොහොමඩ් අන්වර් මොහොමඩ් රිස්කාන් සහ අහමඩ් මිල්හාන් හයාතු මොහොමඩ් යන අය මෙන්ම ප්‍රහාරයට සම්බන්ධ අනෙකුත් සැකකරුවන් ද නඩුව පවරන අවස්ථාව වන විටත් ශ්‍රී ලංකාව තුළ අත්අඩංගුවේ පසුවිය. මෙම එක්සත් ජනපද විමර්ශනයට අදාළ සියලුම කරුණු සහ සාක්ෂි FBI ආයතනය හෝ එරට අධිකරණ දෙපාර්තමේන්තුව සතුව පවතී. වත්මන් රජය විසින් මෙම විමර්ශන නැවත ආරම්භ කර ඇති බැවින්, මෙම තොරතුරු ලබාගැනීම සඳහා එක්සත් ජනපද රජයෙන් ඉල්ලීමක් කර තිබේද? එසේ නම් ඊට ලැබුණු පිළිතුර කුමක්ද? තවමත් එවැනි ඉල්ලීමක් කර නොමැති නම්, ඊට හේතුව කුමක්ද? මෙම සාක්ෂි ද්‍රව්‍ය ශ්‍රී ලංකාවේ අධිකරණ බලධාරීන්ට ලබාදීමට කටයුතු කළ යුතුය.

2019 අප්‍රේල් 21 වන දින සිදුවූ පාස්කු ඉරිදා ප්‍රහාරයෙන් පසුව, එවකට ශ්‍රී ලංකාවේ විමර්ශන ආයතන සතුව ප්‍රමාණවත් විශේෂඥ දැනුමක් නොතිබීම හේතුවෙන්, මේ පිළිබඳව පූර්ණ විමර්ශනයක් පවත්වා වාර්තාවක් ලබාදෙන ලෙස එවකට අග්‍රාමාත්‍ය රනිල් වික්‍රමසිංහ ඇමෙරිකානු රජයෙන් ඉල්ලා සිටියේය.

ඒ සඳහා ශ්‍රී ලංකා බලධාරීන්ගේ පූර්ණ සහයෝගය ලබාදෙන බවට ද අග්‍රාමාත්‍යවරයා සහතික විය. ඉන්පසුව, අප්‍රේල් 22 වැනි දින එවකට අග්‍රාමාත්‍යවරයා සහ එවකට එක්සත් ජනපද ජනාධිපති ඩොනල්ඩ් ට්‍රම්ප් අතර පැවැති දුරකථන සංවාදයකදී ද මෙම ඉල්ලීම යළිත් සිදුකෙරිණි.

ඒ අනුව, අපරාධ පරීක්ෂණ දෙපාර්තමේන්තුව, යුද හමුදා බුද්ධි අංශය සහ රාජ්‍ය බුද්ධි සේවය ඇතුළු ශ්‍රී ලංකාවේ විමර්ශන ආයතන සමඟ ඒකාබද්ධව FBI ආයතනය මෙම ප්‍රහාරය සම්බන්ධයෙන් පූර්ණ විමර්ශනයක් පවත්වන ලදී. එහිදී සටහන් කරගත් සියලුම තොරතුරු සහ එකතු කරන ලද සාක්ෂි පදනම් කරගනිමින් FBI ආයතනය විසින් ශ්‍රී ලංකා රජයට වාර්තාවක් නිකුත් කළ අතර, එය ශ්‍රී ලංකාවේ සියලුම අදාළ බලධාරීන් විසින් පිළිගනු ලැබීය.’