රුපියල් මිලියන 5.94ක් වටිනා විදේශීය සිගරට් තොගයක් රට තුළට නීති විරෝධී ලෙස රැගෙන යෑමට උත්සාහ කළ පුද්ගලයන් දෙදෙනෙකු අද (19) උදෑසන කටුනායක බණ්ඩාරනායක අන්තර්ජාතික ගුවන්තොටුපළේදී අත්අඩංගුවට ගෙන තිබේ.

පොලිස් මත්ද්‍රව්‍ය නාශක කාර්යාංශයේ නිලධාරීන් විසින් විදේශීය සිගරට් තොගය සමඟ මෙම දෙදෙනා අත්අඩංගුවට ගෙන ඇත.

ඔවුන් ඩුබායිහිදී සිගරට් තොගය මිලදී ගෙන කුවේට් සිට ගුවන් යානයකින් ශ්‍රී ලංකාවට පැමිණ ඇත.

අත්අඩංගුවට ගත් දෙදෙනා වයස අවුරුදු 33 සහ 45ක් වන දෙදෙනෙකි.

ඔවුන් ත්‍රිකුණාමලයේ ව්‍යාපාරිකයන් ලෙස හඳුනාගෙන ඇත.

අත්අඩංගුවට ගන්නා අවස්ථාවේ ඔවුන් සතුව සිගරට් 39,600ක් අඩංගු පෙට්ටි 198ක් තිබී ඇත.

සැකකරුවන් සහ ජාවාරම් කළ සිගරට් මීගමුව මහේස්ත්‍රාත් අධිකරණයට ඉදිරිපත් කිරීමට නියමිතය.