June 13, 2026
ඇමෙරිකාවේ ප්රකට ජෝන් එෆ්. කෙනඩි ප්රසංග කලා මධ්යස්ථානයේ (Kennedy Center) මුහුණතින් ජනාධිපති ඩොනල්ඩ් ට්රම්ප්ගේ නම ඉවත්කිරීම වැළැක්වීම සඳහා එම ආයතනය ගත් අවසන් උත්සාහයන් ද අසාර්ථක වී තිබේ.
ගොඩනැගිල්ලෙන් ට්රම්ප්ගේ නම ඉවත්කිරීමට ලබා දී තිබූ සිකුරාදා අවසන් දිනය අත්හිටුවන ලෙස ඉල්ලා කළ ඉල්ලීමක් එරට දිස්ත්රික් විනිසුරු ක්රිස්ටෝෆර් කූපර් විසින් ප්රතික්ෂේප කරන ලදී.
ඊට එරෙහිව මධ්යස්ථානයේ පාලනාධිකාරිය ඉදිරිපත් කළ අභියාචනය ද සිකුරාදා සවස ඉහළ අධිකරණයක් විසින් ප්රතික්ෂේප කර ඇත.
නීතිමය ක්රියාමාර්ග අසාර්ථක වීමත් සමඟ, සිකුරාදා රාත්රියේම සේවකයන් පිරිසක් පැමිණ ට්රම්ප්ගේ නම සහිත අකුරු ඉවත්කිරීම සඳහා ගොඩනැගිල්ල වටා පලංචි සවිකිරීමට පටන් ගෙන තිබේ.
විනිසුරුවරයා තීන්දු කර ඇත්තේ, කෙනඩි මධ්යස්ථානයේ නාමකරණයේ වෙනස්කම් සිදුකිරීමට බලය ඇත්තේ ඇමෙරිකානු කොංග්රස් මණ්ඩලයට පමණක් බවයි.
එසේම, ලබන ජූලි මාසයේ සිට වසර දෙකක කාලයක් සඳහා මධ්යස්ථානය වසාදමා මහාපරිමාණ ප්රතිසංස්කරණ සිදුකිරීමට ට්රම්ප් පරිපාලනය සැලසුම් කර තිබූ අතර, අධිකරණය එම සැලසුම් ද අත්හිටුවා ඇත.
ට්රම්ප් සිය දෙවන ධුර කාලය ආරම්භයේදීම කෙනඩි මධ්යස්ථානයේ පැරණි නායකත්වය ඉවත් කර, එහි සභාපතිත්වය තමන් වෙත පවරා ගනිමින් ගොඩනැගිල්ලට සිය නම එක්කර ගත්තේය.
කෙසේවෙතත්, අධිකරණ නියෝගයට ගරු කරමින් මධ්යස්ථානයේ වෙබ් අඩවියෙන්, නිල ලිපි ශීර්ෂවලින් සහ විද්යුත් තැපැල් අත්සන්වලින් ට්රම්ප්ගේ නම මේ වන විටත් ඉවත් කර ඇත.
පාලනාධිකාරිය පවසන්නේ ගොඩනැගිල්ලේ ප්රතිසංස්කරණ කටයුතු ප්රායෝගිකව අත්යවශ්ය එකක් බවත්, අධිකරණය ඊට බාධා පමුණුවන බවත්ය.
