බැංකු ගිණුම්වලින් රඳවා ගැනීමේ බදු අඩු කිරීම් සහ වාහන නව ලියාපදිංචි කිරීම් ක්‍රියාත්මක කිරීමත් සමඟ, බදු ගෙවන්නන්ගේ හඳුනාගැනීමේ අංක (TIN) සඳහා ස්වේච්ඡා ලියාපදිංචි කිරීම් වැඩි වී තිබේ.

දේශීය ආදායම් දෙපාර්තමේන්තුවේ දේශීය ආදායම් කොමසාරිස් ජනරාල් ආර්. පී.එච්. ප්‍රනාන්දු පැවසුවේ ලියාපදිංචි කිරීම් සංඛ්‍යාව සමස්තයක් ලෙස ඉහළ ගොස් ඇති බවයි.

ලියාපදිංචි කිරීම්වල මෙම වැඩිවීම පිළිබඳ විස්තර කරමින්, දේශීය ආදායම් දෙපාර්තමේන්තුවේ මාධ්‍ය ප්‍රකාශක එන්.එම්.ඒ.කේ. නාපාන පැවසුවේ ලියාපදිංචි කිරීම් මිලියන 12ට ළඟා වී ඇති බවයි.

“බැංකු ගිණුම්වලින් 10%ක ඳවා ගැනීමේ බද්ද ක්‍රියාත්මක කිරීමත් සමඟ, බොහෝ විශ්‍රාමිකයන් ඔවුන්ගේ TIN අංක ලබා ගනිමින් ඉන්නවා,” යැයි ඔහු පැවසීය.

මාර්තු මාසයේදී, දේශීය ආදායම් දෙපාර්තමේන්තුව විසින් චක්‍රලේඛයක් නිකුත් කරමින් සඳහන් කළේ, බදු අය කළ හැකි ආදායමක් නොමැතිව රඳවා ගැනීමේ බද්දට යටත්ව පොලී ආදායමක් ඇති පුද්ගලයන් මෙයින් නිදහස් වීමට ස්වයං ප්‍රකාශයක් ඉදිරිපත් කළ යුතු බවයි.

මෙම ප්‍රකාශන පෝරමයට TIN අංකය ඇතුළත් කළ යුතුව තිබිණි.

නාපානට අනුව, දේශීය ආදායම් දෙපාර්තමේන්තු ප්‍රාදේශීය කාර්යාලවල TIN අංක ලබා ගැනීම සඳහා විශාල පිරිසක් රැස්ව සිට ඇත.

නව වාහන ලියාපදිංචි කිරීම් ආරම්භ වීමත් සමඟ ස්වේච්ඡා TIN ලියාපදිංචි කිරීම් ඉහළ ගොස් ඇති බව ද ඔහු නිරීක්ෂණය කළේය.

කෙසේවෙතත්, මෙය සැළකිව යුතු තදබදයක් ඇති නොකරන බව ඔහු පැවසීය.

“රඳවා ගැනීමේ බද්දට යටත් වූ අය එය ලබා ගැනීමට උනන්දු වන්නේ ඔවුන්ට එය ආර්ථික වශයෙන් දැනෙන බැවින්.”යැයි ඔහු පැවසීය.

ස්වේච්ඡා ලියාපදිංචි කිරීම්වලට අමතරව, දේශීය ආදායම් දෙපාර්තමේන්තුවේ තොරතුරු ඒකකය විසින් ලබාගත් දත්ත මත පදනම්ව ආර්ථික වශයෙන් ක්‍රියාකාරී වයස් කාණ්ඩය සඳහා අනිවාර්ය TIN ලියාපදිංචි කිරීම් සිදුකළ අතර එය ද ලියාපදිංචි කිරීම් සංඛ්‍යාව වැඩි කිරීමට දායක විය.

“අපි වයස අවුරුදු 60ට අඩු අය සඳහා අනිවාර්ය ලියාපදිංචි කිරීම් සිදු කළා. දැන් අපට ලැබෙන ස්වේච්ඡා ලියාපදිංචි කිරීම් එම වයසට වඩා වැඩි අයගෙන්.”යනුවෙන් ඔහු සඳහන් කළේය.

වයස අවුරුදු 18ට වැඩි ආර්ථික වශයෙන් ක්‍රියාකාරී ජනගහනය මිලියන 16ක් පමණ වන බවත්, ඉතිරි මිලියන හතර ලියාපදිංචි කිරීම සඳහා දේශීය ආදායම් දෙපාර්තමේන්තුව එහි අනිවාර්ය ලියාපදිංචි කිරීමේ උත්සාහයන් දිගටම කරගෙන යන බවත් ඔහු පැවසීය.