ටික්ටොක් සමාගමේ නවතම වාර්තාවලට අනුව, ප්‍රජා මාර්ගෝපදේශ උල්ලංඝනය කිරීම හේතුවෙන් 2026 වසරේ මුල් මාස හය තුළ ශ්‍රී ලංකාවෙන් එක්කර තිබූ වීඩියෝ 870,000කට වැඩි ප්‍රමාණයක් ඉවත් කිරීමට පියවර ගෙන තිබේ.

එම සමාගම ප්‍රකාශයට පත් කළ දත්තවලට අනුව 2026 ජනවාරි සහ ජූනි අතර කාලය තුළ වීඩියෝ 871,446ක් ඉවත් කර ඇති අතර, ඊට පළමු කාර්තුව තුළ ඉවත් කළ වීඩියෝ 441,089ක් සහ දෙවන කාර්තුව තුළ ඉවත් කළ වීඩියෝ 430,357ක් ඇතුළත් වේ.

මෙම සංඛ්‍යාලේඛනවලට අනුව, පළමු කාර්තුවට සාපේක්ෂව දෙවන කාර්තුවේදී වීඩියෝ ඉවත් කිරීම් 10,732කින් හෙවත් ආසන්න වශයෙන් 2.4%ක සුළු අඩුවීමක් පෙන්නුම් කරයි.

ටික්ටොක් හි දෙවන කාර්තු වාර්තාවට අනුව, ලොව පුරා ඉවත් කරන ලද වීඩියෝ අතර වඩාත් සාමාන්‍ය කාණ්ඩ ලෙස සංවේදී හෝ වැඩිහිටියන්ට පමණක් සුදුසු අන්තර්ගතයන්, භයානක ක්‍රියාකාරකම්, ලිංගිකත්වය ඉස්මතු වන හැසිරීම් සහ සුරක්ෂිතතා ප්‍රමිතීන් උල්ලංඝනය කිරීම් ප්‍රධාන තැනක් ගෙන ඇත.

කෙසේ වෙතත්, ශ්‍රී ලංකාවෙන් විශේෂයෙන් ඉවත් කරන ලද වීඩියෝ වර්ග පිළිබඳ වෙනම තොරතුරු බිඳවැටීමක් ටික්ටොක් සමාගම මගින් අනාවරණය කර නොමැත. ඉහත සඳහන් ප්‍රතිශත සටහන් වන්නේ ශ්‍රී ලංකාවේ අන්තර්ගතයන් සඳහා පමණක් නොව, ගෝලීය වශයෙන් සිදුකළ වීඩියෝ ඉවත් කිරීම් නිරූපණය කරමිනි.

පළමු කාර්තුව තුළ ශ්‍රී ලංකාවෙන් ඉවත් කරන ලද වීඩියෝ 20,051ක් සහ දෙවන කාර්තුවේදී ඉවත් කරන ලද තවත් වීඩියෝ 12,960ක් පසුව නැවත ප්‍රතිස්ථාපනය කිරීමට පියවර ගත් බව සමාගම හෙළි කළේය. ඒ අනුව මාස හයක කාලය තුළ යළි ප්‍රතිස්ථාපනය කළ සමස්ත වීඩියෝ සංඛ්‍යාව 33,011කි.

දෙවන කාර්තුවේදී ශ්‍රී ලංකාවෙන් ඉවත් කරන ලද වීඩියෝ අතුරින් 99.4%ක්ම පරිශීලකයින් විසින් වාර්තා කිරීමට (report) පෙර හඳුනාගෙන ඉවත් කර ඇති බව එම සමාගම පවසන අතර, පළමු කාර්තුවේදී එම අගය සටහන් වූයේ 99.1%ක් ලෙසයි.

කෙසේ වෙතත්, පැය 24ක් ඇතුළත පූර්ව සක්‍රීය ලෙස ඉවත් කරන ලද වීඩියෝවල ප්‍රතිශතය 95% සිට 93.9% දක්වා සුළු අඩුවීමක් පෙන්නුම් කර ඇත.

කාර්තු දෙක තුළදීම ශ්‍රී ලංකාවේ පළ කරන ලද සමස්ත වීඩියෝ අතුරින් ඉවත් කිරීමේ අනුපාතය පැවතුණේ 0.5%ක මට්ටමකය.