පාරිභෝගික කටයුතු පිළිබඳ අධිකාරියේ විමර්ශන නිලධාරීන් විසින් සිදුකරන ලද වැටලීම්වලින් අනතුරුව, නියමිත උපරිම සිල්ලර මිලට සහ සටහන් කර ඇති මිල ගණන්වලට වඩා වැඩි මිලකට භාණ්ඩ අලෙවි කළ යාපනයේ ව්‍යාපාරික ස්ථාන තිදෙනෙකුට යාපනය මහේස්ත්‍රාත් අධිකරණය මගින් රුපියල් 668,000ක සමස්ත දඩ මුදලක් නියම කර ඇත.

උපරිම සිල්ලර මිල රුපියල් 120ක් වූ ලීටරයේ පානීය ජල බෝතලයක් රුපියල් 200ක මුදලකට අලෙවි කළ යාපනයේ පිහිටි ප්‍රකට ආපනශාලාවක් සහ මත්පැන් හලකට රුපියල් 300,000ක දඩයක් නියම විය.

මුද්‍රිත සිල්ලර මිලට වඩා වැඩි මිලකට සෝඩා බෝතලයක් අලෙවි කළ තවත් කැෆේ එකකට රුපියල් 100,000ක දඩයක් නියම කෙරිණි.

කිලෝග්‍රෑමයක් සඳහා පැවැති උපරිම සිල්ලර මිල වන රුපියල් 255 සීමාව ඉක්මවා යමින් පොන්නි සම්බා සහල් වැඩි මිලට අලෙවි කළ වෙළෙන්දෙකුට රුපියල් 268,000ක දඩයක් නියම විය.

අදාළ හාල් වර්ගය ‘පාල් පොන්නි’ නැමැති වෙනත් වර්ගයක් බව පවසමින් වෙළෙන්දා අධිකරණයේදී නිදහස් වීමට උත්සාහ කළද, පාරිභෝගික අධිකාරිය මගින් ලබාගත් සහල් සාම්පල බතලේගල සහල් පර්යේෂණ ආයතනය වෙත යොමුකර පරීක්ෂා කිරීමේදී එය සාමාන්‍ය ආනයනික පොන්නි සම්බා බව තහවුරු විය.

පාරිභෝගිකයන් යම් භාණ්ඩයක් මිලදී ගැනීමට පෙර එහි සටහන් කර ඇති උපරිම සිල්ලර මිල පරීක්ෂා කරන ලෙසත්, පැමිණිලි කිරීම සඳහා අනිවාර්යයෙන්ම ලබාගන්නා ලදුපත ළඟ තබාගන්නා ලෙසත් පාරිභෝගික කටයුතු පිළිබඳ අධිකාරිය මහජනතාවගෙන් ඉල්ලා සිටියි.

යම් වංචාවක් සිදුවුවහොත් 1977 ක්ෂණික ඇමතුම් අංකය ඔස්සේ පාරිභෝගික අධිකාරිය වෙත පැමිණිලි කළ හැක.