එක්සත් ජාතීන්ගේ මානව හිමිකම් කවුන්සිලයේ ඉදිරි 60 වැනි සැසිවාරයට ශ්‍රී ලංකාව සම්බන්ධයෙන් ඉදිරිපත් කිරීමට නියමිත නව යෝජනාව ‘දරුණු’ ස්වභාවයකින් යුක්ත වනු ඇතැයි අපේක්ෂා නොකරන බව රජය ප්‍රකාශ කළේය.

“විදේශ කටයුතු අමාත්‍යාංශය පළමුව මේ කාරණය අධ්‍යයනය කර ඔවුන්ගේ අදහස් ප්‍රකාශ කරයි. අවශ්‍ය මැදිහත්වීම් පසුව අප විසින් (අධිකරණය සහ ජාතික ඒකාබද්ධතා අමාත්‍යාංශය) සිදු කරනවා. අපගේ අදහස නම් එය ‘දරුණු’ එකක් නොවන බවයි.” යනුවෙන් ජාතික ඒකාබද්ධතා නියෝජ්‍ය අමාත්‍ය මුනීර් මුලෆර් පැවසීය.

ලබන මාසයේ පැවැත්වෙන 60 වැනි සැසිවාරයේදී ශ්‍රී ලංකාව සම්බන්ධයෙන් නව යෝජනාවක් ඉදිරිපත් කරන බව එක්සත් රාජධානිය සහ කැනඩාව රජයට දැනුම් දී ඇති බව මීට පෙර වාර්තා විය.

පෙර යෝජනාවල සම-අනුග්‍රාහකයකු වන එක්සත් ජනපදය තවදුරටත් එක්සත් ජාතීන්ගේ මානව හිමිකම් කවුන්සිලයේ කොටසක් නොවන බැවින්, ශ්‍රී ලංකාව පිළිබඳ මූලික කණ්ඩායම වෙනස් වීමට ඉඩ ඇත.

පෙර මූලික කණ්ඩායමේ එක්සත් රාජධානිය, අමෙරිකා එක්සත් ජනපදය සහ කැනඩාව සමඟ එක් වූ මලාවි, මොන්ටිනිග්‍රෝ සහ උතුරු මැසිඩෝනියාව, මෙම වසරේ එහි පාර්ශ්ව කරුවන් නොවීමට ඉඩ ඇත.

සිවිල් යුද්ධයෙන් පසු වගවීම සහ සංහිඳියාව පිළිබඳ වසර ගණනාවක් තිස්සේ පැවති විවිධ අදහස් දැක්වීම් හේතුවෙන් එක්සත් ජාතීන්ගේ මානව හිමිකම් කවුන්සිලයට ශ්‍රී ලංකාවේ සහභාගීත්වය තීරණාත්මකය.

එම කවුන්සිලය හමුවේ 2009 සිට, රටට එරෙහිව යෝජනා මාලාවක් ගෙනැවිත් ඇති අතර, ආණ්ඩු මාරුවන දේශපාලන ප්‍රමුඛතා මත පදනම්ව සහයෝගීතාව හෝ ප්‍රතිරෝධය ද වෙනස් වේ.