ශ්‍රී ලංකාවේ ඓතිහාසික ඇසළ මහා පෙරහැර මංගල්‍යය දේශපාලන ආරවුල්වලට පටලවා නොගත යුතු බවත්, මෙම ආගමික හා සංස්කෘතික පරම්පරාගත උරුමය දේශපාලන මතභේදවලින් ආරක්ෂා කර ගැනීමේ අවශ්‍යතාවත් ජනාධිපති අනුර කුමාර දිසානායක අවධාරණය කළේය.

ශ්‍රී දළදා මාළිගාවේ සහ සතර මහා දේවාලයන්හි වාර්ෂික ඇසළ මහ පෙරහැර මංගල්‍යය සාර්ථකව නිම වූ බව නිල වශයෙන් දැනුම්දෙමින් අගෝස්තු 28 වැනි දින මහනුවර ජනාධිපති මන්දිරයේදී සම්ප්‍රදායානුකූලව ‘සන්නස’ භාරගැනීමෙන් අනතුරුව ජනාධිපතිවරයා මේ බව ප්‍රකාශ කළේය.

ශ්‍රී දන්තධාතූන් වහන්සේ හා බැඳුණු ඓතිහාසික උරුමය දේශපාලන අරමුණු සඳහා හෝ ආරවුල් විසඳාගැනීම සඳහා භාවිත කිරීම “සම්පූර්ණයෙන්ම සුදුසු නැති” කටයුත්තක් බව ජනාධිපති දිසානායක පෙන්වාදුන්නේය.

රාජ්‍යය, ශ්‍රී දන්තධාතූන් වහන්සේ සහ රටේ සංස්කෘතික උරුමය අතර පවතින සිරිතානුකූල දීර්ඝකාලීන සබඳතාව සිහිපත්කරමින්, පෙරහැර පැවැත්වීම නැවැත්වීම පිළිබඳව ශ්‍රී ලංකාවේ දේශපාලන වේදිකාවල නැවත කිසි දිනෙක කතාබහක් ඇති නොවිය යුතු බව හෙතෙම සඳහන් කළේය.

වාර්ෂික පෙරහැර මංගල්‍යය පැවැත්වීම සඳහා අනුශාසනා ලබාදුන් මල්වතු සහ අස්ගිරි පාර්ශ්වයන්හි මහානායක හිමිපාණන් වහන්සේලා ඇතුළු මහා සංඝරත්නයට ජනාධිපතිවරයා සිය කෘතඥතාව පළකළේය. එසේම දියවඩන නිලමේවරයා, සතර මහා දේවාලයන්හි බස්නායක නිලමේවරුන්, රාජ්‍ය නිලධාරීන්, කලාකරුවන් ඇතුළු පෙරහැර සඳහා දායක වූ සියලු දෙනාගේ කැපවීම ද ඔහු ඇගයීමට ලක්කළේය.

ධනය සහ බලය විසින් සමාජයේ තත්ත්වය මනින වර්තමාන පරිසරයක, සමාජීය අගයන් නැවත තක්සේරු කිරීමේ අවශ්‍යතාව පෙන්වා දුන් ජනාධිපති දිසානායක, සංස්කෘතික උරුමයන් සහ ජාතික අනන්‍යතාව ආරක්ෂා කිරීම මත්ද්‍රව්‍ය මර්දන ව්‍යාපාරයන් සමඟ ද සම්බන්ධ කළේය.

ඒ වෙනුවට මානුෂීය සබඳතා, සංස්කෘතික උරුමය, ඉතිහාසය සමඟ ඇති සබඳතාව සහ කරුණාව වැනි කරුණු සමාජය මෙහෙයවන ප්‍රධාන අගයන් විය යුතු බවද ඔහු පැවසීය.

දළදා පෙරහැර මුල් කරගනිමින් සමස්ත ශ්‍රී ලංකාව පුරා පැවැත්වෙන පෙරහැර සංස්කෘතියට වඩාත් ශිෂ්ට සම්පන්න සමාජයක් ගොඩනැගීමේ විශාල වගකීමක් ඇති බව සඳහන් කළ ජනාධිපතිවරයා, සාම්ප්‍රදායික කලාකාර පරම්පරාවන් ආරක්ෂා කරගැනීම සහ රාජ්‍ය අනුග්‍රහය සහිත සංස්කෘතික පුනරුදයක අවශ්‍යතාව ද අවධාරණය කළේය.

රට හමුවේ ඇති අභියෝග ජයගැනීම සඳහා නව සංස්කෘතික පුනරුදයකට එක්වන ලෙස ජනාධිපතිවරයා මෙහිදී සමස්ත ජනතාවට ආරාධනා කර සිටියේය.