ශ්‍රී ලංකාව ආර්ථික අර්බුදයෙන් ගොඩ ඒමට ගන්නා වූ උත්සාහයේ දී, රජය නිශ්චිත වූ තීන්දු තීරණ ගැනීම ඉතා වැදගත් ය. ජනාධිපති අනුර කුමාර දිසානායක ප්‍රමුඛ වත්මන් පරිපාලනය, 2025 පෙබරවාරි 1 වනදා සිට බලපැවැත්වෙන පරිදි අභ්‍යන්තර දහන (ඉන්ධන ක්‍රියාකාරී), විදුලි සහ දෙමුහුන් වාහන සඳහා වූ ආනයන සීමා ඉවත් කිරීමට ගත් තීරණය ධනාත්මක එකකි. මෙම තීරණය, වාහන ආනයනය කිරීම සහ ඉන්ධන ආනයන සඳහා වැය වන විදේශ මුදල් සංචිත ඉතිරි කර ගැනීමට උපකාරී වන අතර, ශ්‍රී ලංකාව, වඩාත් පරිසර හිතකාමී සංචලන විසඳුම් කරා යොමු කිරීමට ද උපකාරී විය. තවද, මෙමගින් අධික මිලක් ගෙවා වාහන මිලදී ගැනීමට සිදුවූ බොහෝ ශ්‍රී ලාංකිකයින්ට අඩු වියදමකින් නවීන පන්නයේ වාහනයක හිමිකරුවා වීමේ අවස්ථාව සැලසිණි. කෙසේ වෙතත්, මෙම ධනාත්මක පියවර ක්‍රියාත්මක කිරීමට පෙර පවා, සැඟවුණු බලවේග මෙම පියවර දුර්වල කිරීමට උත්සාහයන් හි නිරත වූ බවට සැක මතුවෙමින් පවතින අතර, මෙය ජනතාවට සහ ජාතියේ අනාගතයට එරෙහිව සිදුකරන කුමන්ත්‍රණයක් දැයි ප්‍රශ්න මතුවේ. හුදෙක් මෙය නව වර්ධනයක් නොවන බව අප අමතක නොකළ යුතුය. අභාවප්‍රාප්ත හිටපු මුදල් අමාත්‍ය මංගල සමරවීර විදුලි වාහන (EV වාහන) ආනයනය දිරිමත් කිරීමට යෝජනා ඉදිරිපත් කළ විට, සමහර දුෂ්ට ව්‍යාපාරිකයින් විසින් කරන ලද ප්‍රහාර අප අමතක නොකළ යුතුය. සමරවීර මහතා මුහුණ දුන් අභියෝගවල ස්වභාවය වෙනස් වුවද, වත්මන් පරිපාලනය ඊට නොවෙනස් තත්වයන්ට මුහුණ දී සිටී.

සාම්ප්‍රදායික වාහන වෙළඳපොළේ දුක්ඛිත තත්වය

ශ්‍රී ලංකාවේ වාහන වෙළඳපොළ, EV වාහන ආනයනය සඳහා විවෘත වීමත් සමඟ, නවතම තාක්‍ෂණය යුතු වාහන සාධාරණ මිලකට ශ්‍රී ලංකා වෙළඳපොළට ඇතුළු විය. මේ සමඟ, සාම්ප්‍රදායික අභ්‍යන්තර දහන (ඉන්ධන ක්‍රියාකාරී) වාහන සඳහා ඇති ඉල්ලුම අඩුවීම වැළැක්විය නොහැකිය විය. ජපන් ආනයන වෙළඳපොළත් සමඟ කටයුතු කරන ආනයනකරුවන් හට මෙය අභියෝගයක් බවට පත්ව තිබේ. වාහන වෙළඳපොලෙ හි ඔවුන් හට හිමි ස්ථානය අභියෝගයට ලක්වීමත් සමඟ, ඔවුහු කොළඹ දී මාධ්‍ය සාකච්ඡා පවත්වමින්, EV වාහන ආනයනවල අවිනිශ්චිතතාවයන් ගැන කතා කරමින්, පදනම් විරහිත චෝදනා එල්ල කරමින් සිටිති. ඔවුන්ගේ මෙම ප්‍රකාශ පිටුපස ඇති සත්‍යය නම්, භාවිතා කළ වාහන සඳහා ඇති ඉල්ලුම අඩු වීම නිසා ඔවුන්ගේ වෙළඳපල ස්ථානය නැවත ලබා ගැනීමට ක්‍රම සොයා ගැනීමට ඔවුන්ට බල කර සිටීම යි. මේ සඳහා, ඔවුන් මහජන මතය මෙහෙයවීමට උත්සාහ කරයි. ශ්‍රී ලංකාවේ බොහෝ පිරිසක් වැඩි වශයෙන් EV වාහන වෙත සංක්‍රමණය වෙමින් සිටියද, මෙම දූෂිත සන්ධාන – තාක්ෂණයේ නවතම දියුණුව ජනතාවට අහිමි කිරීමට උත්සාහ ගනිමින් සිටී.

රේගුව සිදු කරන්නේ කුමක්ද?

රේගු දෙපාර්තමේන්තුව තුළ සිටින සමහරක් පාර්ශවයන්, මෙම සැඟවුණු න්‍යාය පත්‍රයේ සාර්ථකත්වයට සහාය දක්වමින්, වාහන ආනයනකරුවන්ගේ සංගමය සමඟ එක්ව EV වාහන වාහන ආනයනය අධෛර්යමත් කිරීම සඳහා කටයුතු කරන බවට සමාජයේ විවෘත කතිකාවක් පවතී. මෙය හඳුනා ගත් බොහෝ දෙනෙකු ඒ සම්බන්ධව ප්‍රශ්න කිරීමට පටන් ගෙන තිබේ. අපි එක් වාහන මාදිලියකට සීමා වන්නේ ඇයි? ඔවුන් එක් නිශ්චිත වාහන වර්ගයක් පමණක් ඉලක්ක කරන්නේ ඇයි? ශ්‍රී ලාංකික පාරිභෝගිකයින්ට නවතම තාක්‍ෂණයේ ප්‍රතිලාභ මෙන්ම දැරිය හැකි මිල ගණන් යටතේ එම වරප්‍රසාද භුක්ති විඳීම වැළැක්වීමට ඔවුන් උත්සාහ කරන්නේ ඇයි? මෙය දූෂිත සන්ධානවල ක්‍රියාකාරිත්වය නිරූපණය නොකරන්නේද? Economy Next වෙබ් අඩෙවිය, රේගු නිලධාරීන්ගේ ඊනියා “පරීක්ෂණ” පැවැත්වීමේ පදනම මත රටට ආනයනය කරන ලද EV වාහන අත්හිටුවීමට සැලසුම් කර ඇති බවට හෙළි කරයි. EV වාහන ආනයනය වැළැක්වීම සඳහා රහසිගත අභිප්‍රේරණයන් සහිත සුදු කරපටි නිලධාරීන්ගේ කූටෝපායන් මේවා නොවන්නේද? 2025 දී කිසිදු වාහන ආනයනයක් සිදු නොවන බව ශ්‍රී ලංකාවේ වාහන ආනයනකරුවන්ගේ සංගමය විසින් මීට පෙර ප්‍රකාශ කර තිබුණි. EV වාහන ආනයනය සඳහා බාධා ඇති කිරීමේ උත්සාහයන් පිටුපස ඇති අභිප්‍රේරණ මෙයින් හෙළි කරගත හැකිය.

ජනතාවට සහ ජාතියට ඇති බලපෑම

මෙම කුමන්ත්‍රණයේ ප්‍රතිඵලය පාරිභෝගිකයින් අසරණ කිරීම වන අතර, රටට ආනයනය කළ හැකි හොඳම වර්ගයේ විදුලි වාහන හිමිකර ගැනීමට ඇති අවස්ථාව අහිමි කිරීමක් ද වේ. වක්‍රව, එය රටට ආනයනය කරන නව විදුලි වාහනවල මිල ඉහළ නංවන අතර, නැවත වරක් භාවිතා කළ වාහන සඳහා වෙළඳපොළක් නිර්මාණය කරයි. EV වාහන සඳහා අහිතකර වෙළඳපල පරිසරයක් නිර්මාණය කිරීම රටේ අනාගතයට සැලකිය යුතු බලපෑමක් ඇති කළ හැකි අතර, එය පහත පරිදි සාරාංශ කළ හැකිය. මිල ඉහළ යාම: ජනතාවට තවදුරටත් නවීන වාහන මිලදී ගැනීමට නොහැකි වීම. පාරිසරික හානිය: හරිතාගාර වායු විමෝචනය අඩු කිරීමේ ජාතික ප්‍රතිපත්තියට බාධා කිරීම. ආර්ථික හානිය: ඉන්ධන ආනයන වැඩිවීම සහ රජයට බදු ආදායම අඩු වීම.

මෙය කරුණු පැහැදිලි කරහොත්, පාරිභෝගික අයිතිවාසිකම් සහ ශ්‍රී ලංකාවේ නිදහස් වෙළඳපොළ ආරක්ෂා කිරීම සඳහා ජනාධිපතිවරයා සහ මුදල් අමාත්‍යාංශය මෙම කුමන්ත්‍රණයට එරෙහිව ඵලදායී හා කඩිනම් පියවර ගත යුතුව තිබේ. විපක්ෂය ජනතාවගේ අවශ්‍යතා සහ අනාගත පරම්පරාවන්ගේ ප්‍රතිලාභ සඳහා ප්‍රමුඛතාවය දිය යුතුය. EV වාහන අංශයට හානි කිරීම මහජන යහපතට ද හානියකි. වාහන ආනයනය සම්බන්ධයෙන් රජය නිදහස් හා සාධාරණ ප්‍රතිපත්තියක් ක්‍රියාත්මක කිරීමට දැන් කාලය පැමිණ තිබේ. සමහරක් රේගු නිලධාරීන් සහ භාවිතා කළ වාහන අලෙවිකරුවන් විසින් ගෙනයන මාෆියා ආකාරයේ කුමන්ත්‍රණයක් තිබේ නම්, මෙය පාරිභෝගිකයින්ගේ මුදලට ඉහළ වටිනාකමක් ලබා දෙන EV වාහන මිලදී ගැනීමට ඇති අවස්ථාවට හානි කරන බව ඉතා පැහැදිලිය. දැක්මක් නොමැතිව ජනතාවක් විනාශ වන බව සොලමන් ප්‍රකාශ කර ඇති අතර, ජාතියක අනාගතය විනිවිදභාවය සහ ඵලදායී සැලසුම් කිරීම මත තීරණය කළ යුතු බව ඉහත උදාහරණ පැහදිලි කරයි. රේගුවේ දී විදුලි වාහන රඳවා තබා ගැනීම හුදකලා ගැටළුවක් නොව, ජනතාවගේ අවශ්‍යතා සහ ප්‍රතිපත්ති සම්පාදන ස්ථාවරත්වය පිළිබඳ ගැටළුවකි. ජාතියක් ලෙස, අපි එවැනි කූටෝපායන් අවසන් කළ යුතුය. සියලු පාර්ශවයන්ගේ සාධාරණ අවශ්‍යතා සලකා බැලිය යුතු අතර සැබෑ වෙළඳපල වටිනාකම පිළිබිඹු කරන සාධාරණ වෙළඳපොළක් නිර්මාණය කළ යුතුය. අපි එසේ නොකරන්නේ නම්, දූෂණයෙන් තොර අනාගතයක් නිර්මාණය කිරීමට අප සැබවින්ම කටයුතු කරනවාද යන්න ප්‍රශ්න කළ යුතුය. වගකිවයුත්තන්, රාජ්‍ය නිලධාරීන්, කුමන්ත්‍රණවරුවන් හට වසන්තය පැමිණෙන විට, එය ජනතාවට ශීත කාලය ගෙන එයි.

දයා ශ්‍රී විද්‍යාරත්න
(සන්ඩේ ටයිම්ස් වාර්තාවක් ඇසුරෙන්)