සේවය අත්හිටුවන ලද පාර්ලිමේන්තුවේ නියෝජ්‍ය මහලේකම් චමින්ද කුලරත්න විසින් කථානායක ජගත් වික්‍රමරත්නට එරෙහිව කරන ලද පැමිණිල්ලක් සම්බන්ධයෙන් පරීක්ෂණයක් ආරම්භ කිරීමට අල්ලස් හෝ දූෂණ චෝදනා විමර්ශන කොමිසම තීරණය කර ඇතැයි සන්ඩේ ටයිම්ස් පුවත්පත වාර්තා කරයි.

එම වාර්තාවේ දැක්වෙන්නේ කුලරත්න විසින් දූෂණ වරදක් කළ බවට චෝදනා කරමින් ආර්. කන්නන් නම් පුද්ගලයකු විසින් අල්ලස් හෝ දූෂණ චෝදනා විමර්ශන කොමිසම වෙත ගොනු කර ඇති පැමිණිල්ලක් විමර්ශනය කිරීමට ද එම කොමිසම තීරණය කර ඇති බවයි.

කුලරත්න පාර්ලිමේන්තුවේ නියෝජ්‍ය මහලේකම්වරයා ලෙස පත් කළ ක්‍රියා පටිපාටිය වැරදි බව ඔහු ප්‍රකාශ කර තිබේ.

පසුගිය බ්‍රහස්පතින්දා කොමිසම රැස්වූ අවස්ථාවේ පැමිණිලි දෙකම සළකා බලා ඇත.

ඒ අනුව, පැමිණිලි දෙක සම්බන්ධයෙන්ම විමර්ශන ආරම්භ කරන ලෙස අල්ලස් හෝ දූෂණ චෝදනා විමර්ශන කොමිසමේ අධ්‍යක්ෂ ජනරාල්වරයාට උපදෙස් ලැබී තිබේ.

පළමු පියවර ලෙස, පැමිණිලි දෙකට අදාළ ලේඛන කොමිසම විසින් පාර්ලිමේන්තුවෙන් ඉල්ලා සිටීමට නියමිතය.

අදාළ ලේඛන විශ්ලේෂණය කිරීමෙන් පසු, කථානායක වික්‍රමරත්න සහ කුලරත්න යන දෙදෙනාගෙන්ම ප්‍රකාශ සටහන් කර ගනු ලැබේ.

අභ්‍යන්තර පරීක්ෂණයකින් පසු කථානායක වික්‍රමරත්නගේ සභාපතිත්වයෙන් යුත් පාර්ලිමේන්තු කාර්ය මණ්ඩල උපදේශක කමිටුව විසින් කුලරත්නගේ සේවය අත්හිටුවන ලදී.

හිටපු පරිපාලන නිලධාරියකු වන එස්.කේ. ලියනගේ විසින් පවත්වන ලද පරීක්ෂණයෙන් තීරණය වූයේ, නියෝජ්‍ය මහලේකම් ධුරයට පත්වීමට අවශ්‍ය නිර්ණායක කුලරත්න සපුරා නොමැති අතර ඔහු එම තනතුරට පත් කළ ක්‍රියාපටිපාටිය දෝෂ සහිත බවයි.

ඔහුගේ වැඩ තහනම් කිරීමෙන් පසු, කථානායකවරයා දූෂණ ක්‍රියා මාලාවක නියැලී සිටින බවට චෝදනා කරමින් කුලරත්න අල්ලස් හෝ දූෂණ චෝදනා විමර්ශන කොමිසම වෙත පැමිණිල්ලක් ගොනු කළේය.

මේ අතර, කථානායක වික්‍රමරත්නගේ පෞද්ගලික ලේකම් චමීර ගාල්ලගේ විසින් ගොනු කරන ලද පැමිණිල්ලේ අඩංගු තොරතුරු සම්බන්ධයෙන් පාර්ලිමේන්තුවේ මහලේකම්වරයාගෙන් වාර්තාවක් ඉල්ලා තිබේ.

මෙම පියවර සම්බන්ධයෙන් විපක්ෂ මන්ත්‍රීවරුන් කණස්සල්ල පළ කර ඇති අතර, එය අල්ලස් හෝ දූෂණ චෝදනා විමර්ශන කොමිසමේ විමර්ශනයට බාධාවක් විය හැකි බවට ඔවුන් තර්ක කර තිබේ.

කථානායක වික්‍රමරත්නට එරෙහිව කුලරත්නගේ පැමිණිල්ල මගින් කථානායකවරයාට එරෙහිව චෝදනා අටක් එල්ල කරයි.

නිශ්චිත චෝදනා වන්නේ නීති විරෝධී ලෙස ඉන්ධන දීමනා දෙකක් ලබා ගැනීම; නිල වාහන අනිසි ලෙස භාවිත කිරීම; පාර්ලිමේන්තු මාධ්‍ය උපකරණ අනිසි ලෙස භාවිත කිරීම; අදාළ ගාස්තු නොගෙවා පාර්ලිමේන්තුවෙන් ආහාර ලබා ගැනීම; නීති විරෝධී ලෙස විමර්ශන නිලධාරියකු පත් කිරීම, පාර්ලිමේන්තු අරමුදල්වලින් ඔහුට ගෙවීම සහ පාර්ලිමේන්තුවේ වියදමින් ඔහුට ආහාර ලබා දීම; නිල නිවාස දෙකක් අනිසි ලෙස භාවිත කිරීම; තොරතුරු දැනගැනීමේ අයිතිවාසිකම් පනත යටතේ තොරතුරු නිකුත් කිරීමට බාධා කිරීම සහ පාර්ලිමේන්තු කාර්ය මණ්ඩලයේ පරිපාලනයට නීති විරෝධී ලෙස ඇඟිලි ගැසීම එම චෝදනායි.