2025 දී ශ්‍රී ලංකාව ඩොලර් මිලියන 1,062.8ක සෘජු විදේශ ආයෝජන(FDI) වාර්තා කර තිබේ.

ශ්‍රී ලංකා ආයෝජන මණ්ඩලය නිවේදනයක් නිකුත් කරමින් කියා සිටියේ සිංගප්පූරුව සහ ඉන්දියාව ඉහළම ආයෝජකයන් ලෙස පෙරමුණ ගෙන ඇති බවයි.

රබර් නිෂ්පාදන ප්‍රමුඛව නිෂ්පාදන අංශය ඇමරිකානු ඩොලර් මිලියන 486ක දායකත්වයක් ලබාදෙමින් පසුගිය වසරේ විදේශ ආයෝජන ගලා ඒමේ ප්‍රධාන අංශය බවට පත්ව ඇති බව ආයෝජන මණ්ඩල දත්ත පෙන්වා දෙයි.

යටිතල පහසුකම් අංශය යනු ඇමරිකානු ඩොලර් මිලියන 404.6ක සෘජු විදේශ ආයෝජන වැඩි ප්‍රමාණයක් ලැබූ දෙවැනි අංශය වන අතර වරාය බහාලුම් පර්යන්ත මගින් ඩොලර් මිලියන 275.3ක ආයෝජන ලැබී තිබිණි.

ව්‍යාපාර ක්‍රියාවලි බාහිරකරණය සහ ආගන්තුක සත්කාර ප්‍රමුඛ සේවා අංශය ඩොලර් මිලියන 168.1ක දායකත්වයක් දක්වා තිබේ.

ශ්‍රී ලංකාවේ ඉහළම ආයෝජකයා සිංගප්පූරුව වූ අතර ඇමරිකානු ඩොලර් මිලියන 318.86ක් ආයෝජනය කර ඇත.

ඉන්දියාව ඩොලර් මිලියන 213.67ක් ආයෝජනය කළේය.

ප්‍රංශය ඇමරිකානු ඩොලර් මිලියන 122.49ක දායකත්වයක් ලබා දුන්නේය.

2025 වසර ජනාධිපති අනුර කුමාර දිසානායකගේ නායකත්වයෙන් යුත් නව රජය යටතේ පළමු පූර්ණ වසර වූ අතර වසරේ මුළු ඇස්තමේන්තුගත වටිනාකම ඇමරිකානු ඩොලර් මිලියන 1,901කි.

2024 දී ආයෝජන මණ්ඩල සමාගම් සඳහා වූ ණය ඇතුළුව ශ්‍රී ලංකාව ඇමරිකානු ඩොලර් මිලියන 846ක මුළු විදේශ ආයෝජන ලබා ගත්තේය.

කෙසේවෙතත්, 2025 වසරේ සෘජු විදේශ ආයෝජනවලට ආයෝජන මණ්ඩල සමාගම් සඳහා වූ ණය ඇතුළත් දැයි වහාම පැහැදිලි නොවීය.