ශ්‍රී ලංකාව වෙනු­වෙන් විස්සයි20 අන්තර්ජාතික තරග බිමේ වැඩිම වාර ගණ­නක් ලකුණු 50 සීමාව පසු කළ පිති­කරු බවට පත්වෙ­මින් පැතුම් නිශ්ශංක ඊයේ රැස්කළ අර්ධ ශත­කය හේතු­වෙන් හොංකොං පිලට එරෙ­හිව පැවති ආසි­යානු කුස­ලාන ක්‍රිකට් තර­ගා­ව­ලියේ 8 වැනි තර­ග­යෙන් කඩුලු 4ක ජයක් හිමි­කර ගැනී­මට ශ්‍රී ලංකාව සමත් විය.

ඩුබායි අන්තර්ජාතික ක්‍රිකට් ක්‍රීඩාං­ග­ණයේ පැවති තර­ගයේ පළ­මුව පන්දු­වට පහරදෙමින් හොංකොං පිල දුන් ලකුණු 150ක ඉල­ක්කය හඹා ගිය ශ්‍රී ලංකා පිල කඩුලු 6ක් දැවී තිබි­යදී ජය හිමි­කර ගත්තේ පන්දු 7ක් ද ඉතිරි කරගනි­මිනි.

ශ්‍රී ලංකාව සහ හිටපු ශ්‍රී ලංකා ආර­ම්භක පිති­කරු කෞෂාල් සිල්වා පුහු­ණු­කරු ලෙස කට­යුතු කරන හොංකොං පිල හමුවූ පළමු අව­ස්ථාව මෙයයි.

මේ තර­ග­යත් සමඟ හොංකොං පිල ජය­ග්‍ර­හ­ණ­ය­කින් තොර­වම තර­ගා­ව­ලියේ මූලික වට­යෙන්ම ඉව­තට විසිවිය.

ශ්‍රී ලංකා පිළි­තුරු ඉනි­මේදී පැතුම් නිශ්ශංක ලකුණු 8ක් ලබාසිටි­යදී දෙවැනි ඕව­ර­යේදී කඩුල්ල මුවාකිරීමේ වර­දට හසුවූ බවට විනි­සුරු තීර­ණය කළත්, එම තීර­ණ­යට අභි­යෝග කිරී­මෙන් පැතුම් තව­දු­ර­ටත් පිටියේ රැඳී සිටී­මට වාස­නා­වන්ත විය.

උඩපන්දු 4ක් ගිලිහී යෑමෙන් ද උප­රිම ප්‍රයෝ­ජ­න­ගත් පැතුම් මේ තර­ගා­ව­ලි­යේදී පිට පිට දෙවැනි අර්ධ ශත­කය ලෙස ලකුණු 68ක් රැස් කර­මින් ශ්‍රී ලංකා ජය මාවත විවර කළේය.

කුසල් මෙන්ඩිස් (11) සමඟ පළමු කඩු­ල්ලට ලකුණු 26ක්, කමිල් මිෂාර (19) සමඟ දෙවැනි කඩුල්ල ලකුණු 36ක් සහ තෙවැනි කඩු­ල්ලට කුසල් පෙරේරා සම­ඟින් එක්ව පන්දු 34කින් ලකුණු 57ක් රැස් කළ පැතුම් ඊයේ වාර්තා කළේ 17 වැනි විස්සයි20 අර්ධ ශත­ක­යයි.

මේ සමඟ ශ්‍රී ලංකාව වෙනු­වෙන් අන්තර්ජාතික විස්සයි20 පිටියේ වැඩිම අවස්ථා ගණ­න­කදී ලකුණු 50 සීමාව පසු කළ පිති­කරු බවට ඔහු පත්විය.

මුළු ලකුණු 119දී පැතුම් දැවී යන විට හතරේ පහර 6ක් සහ හයේ පහර 2ක් සමඟ ලකුණු 68ක් රැස් කර තිබුණේ පන්දු 44ක් පම­ණක් වැය කර­මිනි. පැතුම්ගේ දැවී යෑමත් සමඟ තවත් කඩුලු 3ක් ලකුණු 8ක් තුළ දවා ගැනී­මට හොංකොං පන්දු යවන්නෝ සමත්වූහ.

එහිදී කුසල් පෙරේරා (20), නායක චරිත් අස­ලංක (2) සහ කමිඳු මෙන්ඩිස් (5) දැවීගිය පිති­ක­රු­වන් බවට පත්විය.

වනිඳු හස­රංග පන්දු 9කදී නොදැවී ලකුණු 20ක් රැස් කර­මින් ශ්‍රී ලංකා ජය තහ­වුරු කළ අතර, දසුන් ශානක නොදැවී ලකුණු 6ක් රැස්කර ගෙන සිටි­යේය.

මේ තර­ග­යේදී ශ්‍රී ලංකා පිල එක් වෙන­සක් සිදුකර­මින් මතීෂ පති­රණ වෙනු­වට මහීෂ් තීක්ෂණ කැඳවා තිබිණි.

ශ්‍රී ලංකා පිල සහ­භාගි වන මූලික වටයේ අව­සන් තර­ගය අනිද්දා (18) ඇෆ්ග­නි­ස්තා­න­යට එරෙ­හිව පැවැත්වේ.

හොංකොං – 149/4 (ඕවර 20)

නිසා­කත් ඛාන් නොදැවී 52, අන්ෂි රාත් 48, සීෂාන් අලි 23 (දුෂ්මන්ත චමීර 29/2, දසුන් ශානක 5/1, වනිඳු හස­රංග 27/1)

ශ්‍රී ලංකාව – 153/6 (ඕවර 18.5)

පැතුම් නිශ්ශංක 68, කුසල් ජනිත් 20, වනිඳු හස­රංග නොදැවී 20, කමිල් මිෂාර 19, කුසල් මෙන්ඩිස් 11 (යසිම් මුර්ටාසා 37/2, එෂාන් ඛාන් 25/1, අයි­සස් ඛාන් 27/1, අයුෂ් ෂුක්ලා 30/1)